کوئی پاگل ہی ہو گا جو اس کامیابی پر خوش نہ ہو،ہم حکومت کے ساتھ ہیں، پاکستان زندہ باد،پاک فوج زندہ باد، محمود اچکزئی

اسلام آباد(جانوڈاٹ پی کے)قومی اسمبلی میں قائد حزب اختلاف محمود خان اچکزئی نے کہا ہے کہ کوئی پاگل ہی ہو گا جو اس کامیابی پر خوش نہ ہو، ہم حکومت کے ساتھ ہیں، پاکستان زندہ باد، پاک فوج زندہ باد۔

قومی اسمبلی میں خطاب کرتے ہوئے محمود خان اچکزئی کا کہنا تھاکہ تمام اکابرین کو ایک ساتھ بیٹھنا چاہیے۔

انہوں نے کہا کہ کوئی پاگل ہی ہو گا جو اس کامیابی پر خوش نہ ہو،  ہمارے اختلافات بہت زیادہ ہیں لیکن ان حالات میں ہم ہاکستان کے ساتھ ہیں، ہم خیر اور تقویٰ کے طور پر حکومت کی غیر مشروط حمایت کرتے ہیں، ہم اتنے جاہل نہیں، ہم تعاون کریں گے، ہم حکومت کے ساتھ ہیں، پاکستان زندہ باد،پاک فوج زندہ باد۔

ان کا کہنا تھاکہ اس وقت ٹرمپ کی انا مسئلہ ہے، وہ سمجھتےتھے ایران سرینڈر کر جائے گا۔

محمود اچکزئی کا کہنا تھاکہ پاکستان دنیا کی نعمتوں سے بھرا پڑا ہے پھرہم کیوں بھیک مانگتے ہیں، یہ موقع آسمان سے آیا ہے، اسے گنوانا نہیں چاہیے۔

ان کا مزید کہنا تھاکہ بانی پی ٹی آئی اس ملک کا رہنے والا ہے،اس سے بات کریں، ہم جیل میں بانی پی ٹی آئی سے ملیں گے اورانہیں اپنی باتوں پر راضی کرلیں گے، آج تک جتنی بھی تحریکیں چلی ہیں بانی پی ٹی آئی کوسب سے زیادہ مقبولیت ملی ہے، بانی پی ٹی آئی کو جیل میں ڈالنا جرم ہے اور خواجہ آصف الفاظ کے چناؤ میں احتیاط کریں۔

دوسری جانب سینیٹ اجلاس سے خطاب میں عوامی نیشنل پارٹی کے صدر ایمل ولی خان کا کہنا تھاکہ آج پاکستان کیلئے تاریخی دن ہے، آج ہم اپوزیشن والے حکومت کے کردار پر فخرکرتے ہیں، ہم وزیراعظم پاکستان اور فیلڈ مارشل کو سلام اور مبارکباد پیش کرتے ہیں۔

انہوں نے کہا کہ آج پاکستان نے ثابت کردیا کہ ممالک کے درمیان آگے بڑھنے کیلئے مذاکرات ضروری ہیں، جنگ سے کبھی بھی کسی کا فائدہ نہیں ہوا، امید ہے کہ آنے والے آٹھ 10 دن پاکستان کیلئے مثبت اور اچھے ہوں گے۔

ان کا کہنا تھاکہ پاکستان امن، پیار اور بھائی چارے کا پیغام دیتا ہے، آگے بڑھنا ہے تو مستقل امن کیلئے کوشش کرنا ہوگی۔