رحمان ڈکیت کا بھتیجا’’رنگے ہاتھوں‘‘پولیس کے ہتھے چڑھ گیا

کراچی (جانوڈاٹ پی کے) لیاری میں گینگ وار کے سابقہ کمانڈر رحمان ڈکیت کے بھتیجے کو اس کے ساتھی سمیت پولیس نے کارروائی کے دوران گرفتار کر لیا ہے، جبکہ ملزمان کے قبضے سے اسلحہ اور چھینی گئی موٹر سائیکل بھی برآمد کر لی گئی ہے۔

ایس ایس پی سٹی عارف عزیز کے مطابق ڈسٹرکٹ سٹی پولیس نے لیاری کے علاقے کلاکوٹ میں دورانِ واردات کارروائی کرتے ہوئے دونوں ملزمان کو رنگے ہاتھوں گرفتار کیا۔ پولیس کا کہنا ہے کہ ملزمان مبینہ طور پر اسلحے کے زور پر واردات میں مصروف تھے۔

گرفتار ملزمان کی شناخت حارث اور راشد علی کے ناموں سے ہوئی ہے۔ پولیس ترجمان کے مطابق حارث، لیاری گینگ وار کے بدنام زمانہ سابق کمانڈر رحمان ڈکیت کا بھتیجا ہے۔

پولیس نے ملزمان کے قبضے سے اسلحہ، راؤنڈز اور چھینی گئی موٹر سائیکل برآمد کی، جس کے حوالے سے پہلے ہی تھانہ کلاکوٹ میں مقدمہ درج تھا۔ ترجمان ڈسٹرکٹ سٹی پولیس کے مطابق دونوں ملزمان اس سے قبل بھی مختلف مقدمات میں گرفتار ہو کر جیل جا چکے ہیں۔

پولیس کا کہنا ہے کہ ملزمان کے خلاف مقدمات درج کر لیے گئے ہیں جبکہ مزید قانونی کارروائی جاری ہے۔