گلبرگ ہوٹل آتشزدگی: مالک سمیت 6 افراد کے خلاف مقدمہ درج

لاہور(جانوڈاٹ پی کے) لاہور کے علاقے گلبرگ میں واقع ایک نجی ہوٹل میں آگ لگنے کے واقعے پر لاہور پولیس نے کارروائی کرتے ہوئے ہوٹل کے مالک سمیت 6 افراد کے خلاف مقدمہ درج کر لیا ہے۔

پولیس کے مطابق مقدمہ چیف انسٹرکٹر سول ڈیفنس راشد رفیق کی مدعیت میں تھانہ گلبرگ میں درج کیا گیا ہے۔ مقدمے میں ہوٹل کے مالک ندیم مرزا کے علاوہ فضیل احمد خان، عاطف محمد، کامل خان، بلال شاہ اور محمد مصائب کو نامزد کیا گیا ہے۔

ایف آئی آر کے متن کے مطابق ہوٹل کی بیسمنٹ میں غیر قانونی بوائلر نصب تھا، جسے سوئی گیس کے غیر قانونی کنکشن کے ذریعے چلایا جا رہا تھا۔ پولیس کا کہنا ہے کہ بوائلر چلانے والا شخص ناتجربہ کار تھا، جس کے باعث حادثے کا شدید خدشہ موجود تھا۔

ایف آئی آر میں یہ بھی بتایا گیا ہے کہ ہوٹل انتظامیہ کو اس سے قبل حفاظتی انتظامات مکمل نہ ہونے پر نوٹس جاری کیے جا چکے تھے، تاہم اس کے باوجود غفلت برتی گئی، جو آتشزدگی کا سبب بنی۔

پولیس نے مختلف دفعات کے تحت مقدمہ درج کر کے واقعے کی مزید تحقیقات شروع کر دی ہیں۔