بشریٰ بی بی کی بیٹی کی والدہ سے ملاقات کی درخواست سماعت کیلئے مقرر
لاہور(جانوڈاٹ پی کے) لاہور ہائی کورٹ میں بشریٰ بی بی کی بیٹی مبشرہ خاور کی جانب سے والدہ سے ملاقات کی اجازت کے لیے دائر درخواست سماعت کے لیے مقرر کر دی گئی ہے۔
رجسٹرار آفس نے درخواست پر اعتراض عائد کرتے ہوئے مؤقف اختیار کیا کہ یہ درخواست لاہور ہائی کورٹ کے راولپنڈی بنچ میں دائر ہونی چاہیے تھی۔ رجسٹرار آفس کے اعتراض کے باوجود جسٹس فاروق حیدر آج مبشرہ مانیکا کی درخواست پر سماعت کریں گے۔
درخواست گزار نے مؤقف اختیار کیا کہ جیل رولز کے تحت انہیں اپنی والدہ سے ملاقات کا مکمل حق حاصل ہے، اور جیل شیڈول کے مطابق ہر منگل کو قیدیوں کی فیملی سے ملاقات کا دن مقرر ہے۔
درخواست میں عدالت سے استدعا کی گئی کہ سپرنٹنڈنٹ اڈیالہ جیل کو والدہ بشریٰ بی بی سے ملاقات کرانے کا حکم دیا جائے، جو اس وقت اڈیالہ جیل میں قید ہیں۔
درخواست میں مزید کہا گیا کہ بار بار کوششوں کے باوجود سپرنٹنڈنٹ اڈیالہ جیل والدہ سے ملاقات کی اجازت نہیں دے رہے، جس کے باعث بنیادی حقوق متاثر ہو رہے ہیں۔ عدالت رجسٹرار آفس کے اعتراضات پر فیصلہ کرے گی اور آئندہ کارروائی سماعت کے بعد متوقع ہے۔
