گل پلازہ سانحہ سسٹم کی تباہی کی نشانی،ملک اور سسٹم کی بقا کیلئے لوکل گورنمنٹ کو مضبوط کرنا ہوگا،خواجہ آصف

اسلام آباد(جانوڈاٹ پی کے)وزیر دفاع  خواجہ آصف نے کہا ہےکہ 18ویں ترمیم ایک ڈھکوسلا ثابت ہوئی ہے، سارے  اختیارات  صوبائی حکومت کو منتقل ہوگئے ہیں، کراچی میں ہونے والے واقعات متقاضی  ہیں کہ اختیارات نچلی سطح پر منتقل کیے جائے۔

قومی اسمبلی میں خطاب کرتے ہوئے وزیر دفاع خواجہ آصف نے سانحہ گل پلازہ پر افسوس کا اظہار کرتے ہوئے کہا کہ کراچی میں آتشزدگی کا واقعہ ہوا، اس پر جتنا افسوس کیا جائےکم ہے، ڈمپرز حادثات میں بھی جانی نقصان ہوا۔

خواجہ آصف کا کہنا تھا کہ 18ویں ترمیم ایک ڈھکوسلا ثابت ہواہے، سارے اختیارات صوبائی حکومت کو منتقل ہوگئے ہیں، اتفاق رائے تھا کہ لوکل گورنمنٹ کو اختیارات منتقل کیے جائیں، ہم چاہتے تھے کہ گوادر سےگلگت تک ایک تعلیمی نصاب ہو، کراچی میں ہونے والے واقعات متقاضی ہیں کہ اختیارات نچلی سطح پر منتقل کیے جائے۔

خواجہ آصف کا کہنا تھا کہ جب تک عوام کو اختیارات منتقل نہیں کریں گے یہ ہاؤس بےمعنی رہےگا، ستم ظریفی دیکھیں جب بھی ڈکٹیٹرز آئے انہوں نے بااختیارلوکل گورنمنٹ متعارف کرائی، ایوب خان، ضیاء الحق اور مشرف نے لوکل باڈی کے الیکشن کرائے، ہم لوگ لوکل گورنمنٹ کے الیکشن نہیں کراتے، الیکشن شیڈول بھی آئے توبہانے کرتے ہیں، ہمارےملک اور سسٹم کی بقا کے لیے لوکل گورنمنٹ کو مضبوط کرنا ہوگا۔

وزیر دفاع کا کہنا تھا کہ چین میں موجودہ صدر ایک سیاسی عمل سے ابھر کر سامنے آئے، لوکل گورنمنٹ سے لیڈرشپ پیدا ہوتی ہے اور ایسے عمل سے آگے بڑھتی ہے، آگ کاواقعہ ہمارے سسٹم کی تباہی کی نشانی ہے، ملک میں عوام کو مضبوط کرنے کے لیے لوکل گورنمنٹ کو مضبوط کرنا ہوگا، خواہش ہے کہ ایک مضبوط لوکل گورنمنٹ سسٹم ہو تاکہ ملک آگے بڑھ سکے، ایک ایسا نظام تعلیم ہونا چاہیےکہ وفاق سمیت صوبوں کو بھی نئی نسل پہچانے ، یکساں نظام تعلیم ایک قوم بناتا ہے لیکن ایسا نہ ہو سکا۔

ان کا مزید کہنا تھا کہ ایسا نظام اب بننا چاہیے تاکہ صوبے سے تحصیل اور وارڈ کی سطح تک اختیارات جائیں، اگر یہی رہا تو پھر آخر میں وزارت دفاع کی فائر بریگیڈ ہی آگ بجھانے کے لیے آئےگی، پاکستان کے استحکام کے لیے اب فیصلے کرنا ہوں گے۔