کیٹی پیری اور جسٹن ٹروڈو کی ڈیووس فورم میں مشترکہ انٹری، تصاویر اور ویڈیوز وائرل

ڈیووس (مانیٹرنگ ڈیسک)امریکی پاپ گلوکارہ کیٹی پیری نے ورلڈ اکنامک فورم کے موقع پر اپنے بوائے فرینڈ اور کینیڈا کے سابق وزیراعظم جسٹن ٹروڈو کے ہمراہ ڈیووس میں انٹری دی، جس کی تصاویر اور ویڈیوز سوشل میڈیا پر وائرل ہوگئیں۔

کیٹی پیری اور جسٹن ٹروڈو نے سوئٹزرلینڈ کے شہر ڈیووس میں جاری ورلڈ اکنامک فورم میں ایک ساتھ شرکت کی، جہاں دونوں کی موجودگی نے شرکا اور میڈیا کی خاص توجہ حاصل کی۔ جوڑے کے درمیان رومانوی تعلقات کی خبریں پہلی بار 2025 میں اس وقت سامنے آئیں جب انہیں مونٹریال میں ایک ساتھ دیکھا گیا تھا، بعد ازاں کیٹی پیری نے تصاویر شیئر کر کے اس تعلق کی تصدیق بھی کی۔

تعلقات منظرِ عام پر آنے کے بعد یہ پہلا موقع ہے کہ دونوں کو کسی بڑے عالمی فورم پر ایک ساتھ دیکھا گیا۔ فورم کے دوران جسٹن ٹروڈو نے اجلاس سے خطاب بھی کیا جس میں انہوں نے بدلتی عالمی صورتحال، سفارت کاری اور بین الاقوامی تعاون کی اہمیت پر تفصیلی گفتگو کی۔

اپنے خطاب میں سابق کینیڈین وزیراعظم کا کہنا تھا کہ دوسری جنگِ عظیم کے بعد دنیا نے جو تقریباً 80 سال کا استحکام اور خوشحالی دیکھی، وہ اب اختتام کی جانب بڑھ رہی ہے اور دنیا ایک نئے مرحلے میں داخل ہو چکی ہے۔

کیٹی پیری اور جسٹن ٹروڈو کی مشترکہ انٹری کی ویڈیوز اور تصاویر سوشل میڈیا پر تیزی سے وائرل ہوئیں، جس پر صارفین کی جانب سے مختلف دلچسپ تبصرے بھی سامنے آ رہے ہیں۔

واضح رہے کہ کیٹی پیری کی اپنے سابق منگیتر اورلینڈو بلوم سے ایک بیٹی ہے، جبکہ جسٹن ٹروڈو کی سابقہ اہلیہ سوفی گریگوائر ٹروڈو سے تین بچے ہیں۔