کراچی: کتے کے کاٹنے کے واقعات وبا کی شکل اختیار کر گئے، پانچ دنوں میں 859 افراد زخمی

کراچی(جانوڈاٹ پی کے)شہرِ قائد میں کتے کے کاٹنے کے واقعات وبا کی صورت اختیار کر گئے ہیں۔ رواں سال کے صرف پہلے پانچ دنوں میں کتوں نے 859 افراد کو کاٹ لیا۔

نجی اسپتال کورنگی میں پانچ دنوں کے دوران 300 نئے سگ گزیدگی کے کیسز رپورٹ ہوئے، جب کہ سول اور جناح ہسپتال میں بھی 300 سے زائد کیسز سامنے آئے۔ انچارج ڈاگ بائٹ کلینک، ڈاکٹر آفتاب گوہر کے مطابق زیادہ تر کیسز کورنگی، حب چوکی، بلدیہ، لانڈھی اور گڈاپ سے رپورٹ ہوئے۔ نجی ہسپتال میں ایک 41 سالہ شخص کو کتے کے کاٹے کے بعد انفیکشن بڑھنے پر انگلی کاٹنی پڑی۔

ڈاکٹر آفتاب گوہر نے شہریوں کو خبردار کیا کہ ریبیز کی علامات ظاہر ہونے کے بعد یہ بیماری تقریباً ہمیشہ جان لیوا ثابت ہوتی ہے۔ انہوں نے اپیل کی کہ کسی بھی ڈاگ بائٹ کی صورت میں فوری طبی امداد حاصل کریں اور ویکسین لگوائیں۔