اسلام آباد بلدیاتی انتخابات شیڈول واپس لینے کا نوٹیفکیشن چیلنج

اسلام آباد (جانوڈاٹ پی کے) وفاقی دارالحکومت میں بلدیاتی انتخابات کے شیڈول کو واپس لینے کے الیکشن کمیشن کے نوٹیفکیشن کو جماعت اسلامی نے اسلام آباد ہائیکورٹ میں چیلنج کر دیا ہے۔ عدالت نے فریقین کو نوٹس جاری کرتے ہوئے جواب طلب کر لیا ہے۔

جسٹس محمد اعظم خان نے جماعت اسلامی کی درخواست پر سماعت کی، جس میں جماعت اسلامی اسلام آباد کے امیر نصر اللہ رندھاوا اپنے وکیل چودھری شعیب احمد کے ہمراہ عدالت میں پیش ہوئے۔

درخواست گزار کے وکیل نے مؤقف اختیار کیا کہ اس سے قبل لوکل گورنمنٹ ترمیمی آرڈیننس کو بھی عدالت میں چیلنج کیا جا چکا ہے اور اب الیکشن کمیشن نے بلدیاتی انتخابات کا شیڈول واپس لے لیا ہے۔ وکیل نے مزید بتایا کہ اسلام آباد میں 2015 میں بلدیاتی انتخابات ہوئے تھے جن کی پانچ سالہ مدت مکمل ہو چکی ہے۔

وکیل کے مطابق قانون کے تحت بلدیاتی اداروں کی مدت ختم ہونے کے بعد 120 دن کے اندر نئے انتخابات کا انعقاد لازم ہے، لہذا الیکشن شیڈول واپس لینے کے نوٹیفکیشن کو کالعدم قرار دے کر فوری انتخابات کرانے کا حکم دیا جائے۔

درخواست گزار کی جانب سے عدالت سے یہ استدعا بھی کی گئی کہ مرکزی کیس 27 جنوری کو مقرر ہے، اس وقت تک الیکشن کمیشن کا نوٹیفکیشن معطل کیا جائے، تاہم عدالت نے فوری حکمِ امتناع جاری کرنے سے انکار کر دیا۔

اسلام آباد ہائیکورٹ نے کیس کی مزید سماعت 27 جنوری تک ملتوی کر دی ہے۔