عمران خان کے ایکس اکاؤنٹ کی تحقیقات: این سی سی آئی اے رپورٹ عدالت میں جمع
اسلام آباد (جانوڈاٹ پی کے)اسلام آباد ہائیکورٹ میں بانی پی ٹی آئی عمران خان کے ایکس (سابقہ ٹویٹر) اکاؤنٹ سے متعلق انویسٹی گیشن پر این سی سی آئی اے کی رپورٹ جمع کرا دی گئی ہے۔ رپورٹ میں بتایا گیا ہے کہ عمران خان نے تحقیقات میں تعاون نہیں کیا۔
این سی سی آئی اے کی رپورٹ کے مطابق بانی پی ٹی آئی کے ایکس اکاؤنٹ سے کی جانے والی ٹویٹس پر دو الگ انکوائریز زیر التوا ہیں۔ یہ دونوں انکوائریز 19 مئی اور 13 ستمبر 2024 کو این سی سی آئی اے میں رجسٹرڈ کی گئی تھیں۔
رپورٹ میں عدالت کو آگاہ کیا گیا کہ این سی سی آئی اے کی انویسٹی گیشن ٹیم نے اڈیالہ جیل میں تحقیقات کے لیے متعدد بار دورہ کیا، تاہم عمران خان نے یہ نہیں بتایا کہ ان کا ایکس اکاؤنٹ کون چلا رہا ہے۔ این سی سی آئی اے نے مؤقف اختیار کیا کہ بانی پی ٹی آئی نے انویسٹی گیشن ٹیم کے ساتھ تعاون نہیں کیا اور سوشل میڈیا اکاؤنٹس کے حوالے سے کوئی معلومات فراہم نہیں کیں۔
این سی سی آئی اے کی رپورٹ میں مزید کہا گیا ہے کہ ایکس اکاؤنٹ کے استعمال سے متعلق سوالات کے باوجود عمران خان نے تعاون کرنے سے انکار کیا، جس کے باعث تحقیقات تاحال جاری ہیں۔
