ایران میں مہنگائی کیخلاف پُرتشدد مظاہرے بے قابو، ہلاکتیں 217 تک پہنچ گئیں، ٹائم میگزین

نیویارک(جانوڈاٹ پی کے)ایران میں مہنگائی کے خلاف جاری پُرتشدد مظاہرے  بے قابو ہوگئے،  معروف امریکی جریدے ٹائم میگزین نے دعویٰ کیا ہے کہ جھڑپوں کے دوران اموات کی تعداد 217 ہوگئی۔

ایران میں حکومت مخالف مظاہروں میں گزشتہ رات سے مزید اضافہ دیکھنے میں آیا  جہاں مختلف شہروں میں مظاہرین اور سکیورٹی اہلکاروں کے درمیان شدید جھڑپیں ہوئیں۔ احتجاج کے دوران مظاہرین نے کئی شہروں میں   توڑ پھوڑ کی۔

رپورٹس کے مطابق مظاہرین کی جانب سے 26 بینک، 25مساجد، 2 اسپتال اور   48 فائر ٹرکوں کو نقصان پہنچایاگیا جبکہ سرکاری عمارتوں اور پولیس اسٹیشنز  پر  بھی حملےکیے گئے جس کے نتیجے میں کئی اہلکار  زخمی ہوئے۔

میڈیا رپورٹس کے مطابق پرتشدد مظاہرے کرنے والوں نے ایمبولینسوں پر بھی حملے کیے، بسوں اور شہریوں کی گاڑیوں کو بھی آگ لگائی گئی۔ سکیورٹی اہلکاروں کی جانب سے  تقریبا ڈھائی ہزار  افراد کو گرفتار کیاجاچکا ہے جبکہ انٹرنیٹ سروس بدستور  بند ہے۔

تہران کے ایک ڈاکٹر نے نام ظاہر نہ کرنے کی شرط پر امریکی جریدے ٹائم کو بتایاکہ دارالحکومت کے صرف 6 اسپتالوں میں 217  مظاہرین کے ہلاکتوں کی تصدیق ہوئی اور  ان میں سے زیادہ تر لوگ گولیاں لگنے سے ہلاک ہوئے تاہم ایرانی حکام نے تاحال ہلاکتوں کی تصدیق نہیں کی۔

امریکی جریدے کے مطابق واشنگٹن ڈی سی کی ہیومن رائٹس ایکٹیوسٹ نیوز  ایجنسی نے رپورٹ کیا کہ اب تک کم از کم 63 افراد ہلاک ہوئے، جن میں 49 عام شہری شامل ہیں۔