ایران میں غیر قانونی طور پر داخل ہونیوالے 10 افغان شہری ایرانی بارڈر گارڈز کی فائرنگ سے ہلاک: افغان حکام

کابل(جانوڈاٹ پی کے)افغان حکام نے دعویٰ کیا ہے کہ ایران میں داخل ہونے کی کوشش کرنے والے کم از کم 10 افغان شہری ایرانی بارڈر گارڈز کی فائرنگ سے ہلاک ہوگئے۔

غیر ملکی میڈیا کے مطابق افغانستان کے مغربی صوبے فراہ کی سکیورٹی کمان کے ترجمان محمد نسیم بدری نے سرکاری ریڈیو کو بتایا کہ یہ افراد ’روزگار کی تلاش‘ میں ایران گئے تھے اور پیر کی رات شیخ ابو نصر فراحی بارڈر پوائنٹ کے ذریعے ایران کی حدود میں داخل ہوئے تھے جہاں انہیں فائرنگ کرکے ہلاک دیا گیا۔

ترجمان نے بتایا کہ تمام ہلاک شدگان صوبہ فراہ کے رہائشی تھے اور غیر قانونی طور پر سرحد پار کر رہے تھے۔

محمد نسیم بدری نے یہ بھی بتایا کہ اسی گروہ میں شامل 2 افغان شہری تاحال لاپتا ہیں اور واقعے کی تحقیقات جاری ہیں جبکہ ایران کی جانب سے اس واقعے پر اب تک کوئی ردعمل سامنے نہیں آیا۔

یہ واقعہ ایسے وقت پیش آیا ہے جب ایران اور افغانستان کی سرحد پر کشیدگی میں اضافہ دیکھنے میں آ رہا ہے۔گزشتہ ایک سال کے دوران ایران نے سیکڑوں افغان مہاجرین کو زبردستی واپس بھیجا ہے۔