متنازع ٹویٹ کیس:عدالت نے ایمان مزاری کو بڑا ریلیف دے دیا

اسلام آباد(جانوڈاٹ پی کے)ڈسٹرکٹ اینڈ سیشن کورٹس اسلام آباد نے سابق رہنما پی ٹی آئی شیریں مزاری کی بیٹی ایمان مزاری کو متنازع ٹویٹ کیس میں حاضری سے استثنا دے دیا۔

ایمان مزاری اور ہادی علی چٹھہ کے خلاف کیس کی سماعت ایڈیشنل ڈسٹرکٹ اینڈ سیشن جج محمد افضل مجوکہ نے کی۔ سماعت کے دوران ہادی علی چٹھہ عدالت میں پیش ہوئے، جبکہ ایمان مزاری پیش نہ ہو سکیں۔

ہادی علی چٹھہ نے عدالت کو آگاہ کیا کہ ایمان مزاری کو 104 بخار ہے، جس کی وجہ سے وہ حاضر نہیں ہو سکتیں۔ انہوں نے بتایا کہ انہیں خود بھی بخار ہے، لیکن وہ عدالت آئے تاکہ یہ نہ لگے کہ بہانہ بنایا جا رہا ہے۔

جج محمد افضل مجوکہ نے ہدایت دی کہ ایمان مزاری کی حاضری سے استثنا کی تحریری درخواست دائر کی جائے، جس کے بعد سماعت میں وقفہ دیا گیا۔

وقفے کے بعد ہادی علی چٹھہ کی جانب سے یہ تحریری درخواست دائر کی گئی، جسے عدالت نے منظور کر لیا۔ بعد ازاں عدالت نے ایمان مزاری اور ہادی علی چٹھہ کے خلاف متنازع ٹویٹ کیس کی سماعت 14 جنوری تک ملتوی کر دی۔

واضح رہے کہ ایمان مزاری اور ہادی علی چٹھہ کے خلاف این سی سی آئی اے (NCCIA) نے مقدمہ درج کر رکھا ہے۔