امام رضا علیہ السلام کے روضہ کے اطراف برفباری کے روح پرورمناظر،ایران میں خشک سالی ختم

مشہد (مانیٹرنگ ڈیسک)ایران کے مقدس شہر مشہد میں طویل عرصے کے خشک موسم کے بعد ہونے والی برفباری نے شہر کے حسن کو دوبالا کر دیا ہے۔ کئی مہینوں سے ایران شدید خشک موسم کی لپیٹ میں تھا، تاہم حالیہ برفباری نے نہ صرف موسم کو خوشگوار بنا دیا بلکہ شہریوں کے چہروں پر بھی خوشی بکھیر دی۔

برف کی سفید چادر نے مشہد کی گلیوں، سڑکوں اور تاریخی و مذہبی مقامات کو اپنی لپیٹ میں لے لیا، جس سے انتہائی خوبصورت اور روح پرور مناظر دیکھنے میں آئے۔ امام رضا علیہ السلام کے روضہ کے اطراف برفباری کے مناظر نے زائرین اور مقامی افراد کو خاص طور پر اپنی جانب متوجہ کیا، جبکہ شہریوں نے ان لمحات کو کیمروں میں محفوظ کر کے سوشل میڈیا پر بھی شیئر کیا۔

ماہرین موسمیات کے مطابق یہ برفباری خشک سالی سے متاثرہ علاقوں کے لیے ایک خوش آئند اشارہ ہے، کیونکہ اس سے زیرِ زمین پانی کی سطح بہتر ہونے اور زرعی شعبے کو فائدہ پہنچنے کی امید کی جا رہی ہے۔ شہریوں کا کہنا ہے کہ طویل عرصے بعد ہونے والی اس برفباری نے نہ صرف موسم کو خوشگوار بنایا بلکہ خشک سالی کے اثرات کم ہونے کی امید بھی پیدا کی ہے۔

مشہد میں برفباری کے یہ دلکش مناظر سوشل میڈیا پر تیزی سے وائرل ہو رہے ہیں اور لوگ انہیں قدرت کا خوبصورت تحفہ قرار دے رہے ہیں۔