سندھ پنجاب بارڈر پر کارروائی، 22 غیرقانونی افغان شہری گرفتار
اوباڑو (جانوڈاٹ پی کے) رینجرز اور پولیس نے سندھ پنجاب بارڈر کے قریب مشترکہ کارروائی کرتے ہوئے غیرقانونی طور پر مقیم 22 افغان شہریوں کو گرفتار کر لیا۔
پولیس کے مطابق بارڈر ایریا میں مشکوک افراد کی چیکنگ کے دوران گرفتار افراد قومی شناختی کارڈ پیش کرنے میں ناکام رہے، جس پر انہیں حراست میں لے لیا گیا۔ ابتدائی تفتیش کے دوران انکشاف ہوا کہ گرفتار افغان شہریوں کے پاس نہ تو پاسپورٹ موجود تھا اور نہ ہی پاکستان میں قیام سے متعلق کوئی قانونی دستاویزات تھیں۔
ترجمان پولیس نے بتایا کہ گرفتار افغان باشندوں کے خلاف قانونی کارروائی کرتے ہوئے مقدمہ درج کر لیا گیا ہے، جبکہ تمام افراد کو ضابطے کی کارروائی مکمل ہونے کے بعد جیل منتقل کر دیا گیا ہے۔
پولیس اور رینجرز حکام کے مطابق غیرقانونی مقیم افراد کے خلاف کارروائیاں جاری رہیں گی تاکہ سرحدی علاقوں میں امن و امان کو یقینی بنایا جا سکے۔
