ٹانک میں پولیس بکتر بند پر آئی ای ڈی حملہ، ایس ایچ او سمیت 6 اہلکار شہید

پشاور(جانوڈاٹ پی کے) خیبرپختونخوا کے ضلع ٹانک میں پولیس کی بکتر بند گاڑی پر آئی ای ڈی حملے کے نتیجے میں ایس ایچ او سمیت 6 پولیس اہلکار شہید ہو گئے۔

پولیس کے مطابق دھماکا ٹانک کے علاقے گومل میں کوٹ ولی سے تقریباً 25 کلومیٹر کے فاصلے پر پیش آیا، جہاں پولیس کی اے پی سی (آرمرڈ پرسنل کیریئر) کو نشانہ بنایا گیا۔ دھماکے کے باعث بکتر بند گاڑی مکمل طور پر تباہ ہو گئی۔

ابتدائی اطلاعات کے مطابق شہید ہونے والوں میں اسحاق (ایس ایچ او)، اے ایس آئی شیر عالم، شفیع، حضرت علی، احسان اللہ اور ڈرائیور مجید شامل ہیں۔ بکتر بند گاڑی گومل سے ٹانک کی جانب آ رہی تھی کہ حملے کا نشانہ بنی۔

واقعے کی اطلاع ملتے ہی ریسکیو 1122 کی ٹیمیں فوری طور پر جائے وقوع پر پہنچ گئیں اور شہداء کی لاشوں کو ہسپتال منتقل کیا گیا۔

سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے جبکہ واقعے کی مزید تحقیقات جاری ہیں۔