آپریٹرز کی کوتاہی کے باعث کوئی عازم سفر حج پر نہ جا سکا تو کمپنی کا لائسنس منسوخ ہوگا

اسلام آباد(جانوڈاٹ پی کے)اس بار کوئی شہری حج سے محروم ہوا تو آپریٹرز کےخلاف نہایت سخت ایکشن لیا جائے گا، حکومت نے اس سلسلے میں اہم فیصلہ کرلیا۔

تفصیلات کے مطابق پرائیویٹ عازمین حج کی رقم جمع نہ کرانے والے آپریٹرز کےخلاف سخت کارروائی کا فیصلہ کرلیا گیا ہے، آپریٹرز کی کوتاہی کے باعث کوئی عازم سفر حج پر نہ جا سکا تو کمپنی کا لائسنس منسوخ ہوگا۔

ذرائع نے بتایا کہ بروقت عازمین حج کی رقوم منتقلی میں ناکام حج آپریٹرز کا لائسنس منسوخ کیا جائےگا، کمپنی آئندہ حج آپریٹرز کے طور پر کام نہیں کرسکےگی۔

وزارت مذہبی امور کے ذرائع نے مزید بتایا کہ مالی بے ضابطگی پر متعلقہ حج آپریٹرکےخلاف کارروائی کی جائےگی۔

ذرائع نے بتایا کہ 15 دسمبر تک سروسز حاصل نہ کرنیوالے آپریٹرز کا بقیہ کوٹہ سرکاری حج اسکیم میں تبدیل کیا جائےگا، سعودی عرب میں حج 2026 کے اخراجات جمع کرانے کی آخری تاریخ 31 دسمبر ہے۔

وزارت مذہبی امور کی جانب سے تمام پرائیویٹ حج آپریٹرز کو حج پیکیج کی 100 فیصد رقم متعلقہ سعودی اکاؤنٹس میں جمع کرانے کی ہدایت کردی گئی ہے۔