گل پلازہ آتشزدگی: تاجر پلازہ کے باہر اذانیں دینے لگے،شہر کی فضا سوگوار

کراچی (جانوڈاٹ پی کے) کراچی کے مصروف علاقے ایم اے جناح روڈ پر واقع معروف گل پلازہ میں رات گئے بھڑکنے والی خوفناک آگ پر تاحال مکمل طور پر قابو نہیں پایا جا سکا، جس کے باعث شہر بھر میں غم اور تشویش کی فضا قائم ہے۔

آتشزدگی کے نتیجے میں تاجروں کو اربوں روپے کے مالی نقصان کا سامنا کرنا پڑا، جبکہ 5 افراد جاں بحق اور 20 سے زائد زخمی ہو چکے ہیں۔ ریسکیو ذرائع کے مطابق متعدد افراد کے عمارت میں پھنسے ہونے کا خدشہ بھی ظاہر کیا جا رہا ہے۔

فائر بریگیڈ حکام کا کہنا ہے کہ اب تک آگ کے صرف 40 فیصد حصے پر قابو پایا جا سکا ہے، جبکہ شدید آگ کے باعث امدادی کارروائیوں میں مشکلات درپیش ہیں۔ حکام کے مطابق گل پلازہ میں ایک ہزار سے زائد دکانیں قائم ہیں، جبکہ عمارت میں پڑنے والی گہری دراڑوں کے باعث صورتحال مزید سنگین ہو گئی ہے۔ فائر بریگیڈ نے متاثرہ عمارت کو انتہائی خطرناک قرار دے دیا ہے۔

آگ کی شدت اور جانی نقصان کے خدشے کے پیش نظر تاجروں نے گل پلازہ کے باہر کھڑے ہو کر با آوازِ بلند اذانیں دینا شروع کر دیں۔ اذانوں کی گونج نے پورے علاقے کو رنج و الم میں مبتلا کر دیا، ہر آنکھ اشکبار اور ہر دل لرزتا ہوا دکھائی دیا۔

اس المناک واقعے پر گورنر سندھ، چیئرمین پاکستان پیپلز پارٹی بلاول بھٹو زرداری، مصطفیٰ کمال، وزیراعلیٰ سندھ سمیت دیگر سیاسی و سماجی شخصیات نے گہرے دکھ اور افسوس کا اظہار کرتے ہوئے جاں بحق افراد کے لواحقین سے تعزیت اور زخمیوں کی جلد صحتیابی کے لیے دعا کی ہے۔