غزہ میں جنگ بندی کا خاتمہ بین الاقوامی ضمانتوں کی ناکامی ہوگی، حماس رہنما
غزہ(جانوڈاٹ پی کے)فلسطینی مزاحمتی تنظیم حماس کے سینئررہنما اسامہ حمدان کا کہنا ہےکہ اسرائیل کے خلاف مزاحمت تمام فلسطینی عوام کی خواہش ہے۔
عرب میڈیا کے مطابق حماس کے سینئر رہنما اسامہ حمدان نے ایک بیان میں کہا ہےکہ قابض اسرائیلی حکومت تمام فلسطینیوں کی دشمن ہے، حماس میں اختلافات کی من گھڑت باتوں کے پیچھے اسرائیل ہے۔
اسامہ حمدان کا کہنا ہےکہ آئندہ مرحلے میں دنیا حماس کا مضبوط انتظامی ڈھانچہ دیکھے گی، اسرائیلی جرائم کو مزاحمت سے جوڑنا غاصبانہ قبضے کے لیے ہے۔
حماس رہنما کے مطابق غزہ جنگ بندی سے اب تک 400 سے زائد فلسطینی اسرائیلی فورسز کے ہاتھوں شہید ہوئے، اسرائیل غزہ پٹی میں امداد اور انفرااسٹرکچر کی بحالی میں رکاوٹیں کھڑی کر رہا ہے۔
اسامہ حمدان کا کہنا ہےکہ حماس کو اسرائیل کی مسلسل خلاف ورزیوں پر ردعمل کا مکمل حق حاصل ہے، غزہ میں جنگ بندی کا خاتمہ بین الاقوامی ضمانتوں کی ناکامی ہوگی۔
انہوں نے مزید کہا کہ حماس اسرائیلی خلاف ورزیوں کے حوالے سے ثالثی ممالک قطر، ترکیے اور مصر کے ساتھ رابطے میں ہے۔
