غزہ میں اسرائیلی حملے جاری، خواتین اور بچوں سمیت 10 فلسطینی شہید

غزہ(جانوڈاٹ پی کے)غزہ میں جنگ بندی کی اسرائیلی خلاف  ورزیاں جاری ہیں،گزشتہ 24 گھنٹوں کے دوران غزہ  پر اسرائیلی فضائی  حملوں  میں خواتین  اور  بچوں سمیت  10 فلسطینی شہید  ہوگئے۔

فلسطینی خبر ایجنسی کے مطابق جنوبی غزہ کے علاقے خان یونس میں اسرائیلی فضائی حملوں  میں 4 فلسطینی اور غزہ  شہر میں بےگھر فلسطینیوں کے تربیتی مرکز  پر حملے میں 6 فلسطینی شہید ہوئے۔

10 اکتوبرکے جنگ بندی معاہدےکے بعد سے 400 سے زائد فلسطینی شہیدکیے جاچکے ہیں۔

عالمی ادارہ صحت کے مطابق غزہ میں 16 ہزار  سے  زائد  مریض  بیرون ملک علاج کے منتظر ہیں۔

امدادی تنظیم ڈاکٹرز  وِدآؤٹ بارڈرز کے مطابق  یہ تعداد اصل  میں تین سے چار گنا  زیادہ  ہوسکتی ہے۔

عالمی ادارہ صحت کی رپورٹ کے مطابق جولائی 2024 سے اب تک غزہ میں ہزار  سے زائد مریض بروقت طبی انخلا نہ ہونے کے باعث جان کی بازی ہار چکے ہیں۔

سربراہ ڈبلیو ایچ اوٹیڈروس نے ایک بیان میں کہا کہ جنگ کے آغاز سے اب تک 10 ہزار 600 سے زائد شدید بیمار مریضوں کو غزہ  سے نکالا گیا، جن میں 5  ہزار 600 سے  زیادہ  بچے شامل ہیں، لیکن ہزاروں مریض اب بھی علاج کے منتظر ہیں۔

دوسری جانب ترک انٹیلی جنس ایجنسی کے سربراہ ابراہیم قالن کی حماس وفد سے استنبول میں ملاقات ہوئی، حماس وفد کی سربراہی رہنما خلیل الحیہ کر رہے تھے۔

ترک حکام کے مطابق ملاقات میں غزہ جنگ بندی معاہدے کے دوسرے مرحلے تک جانے کے لیے ضروری اقدامات پر بات چیت ہوئی اور اسرائیلی فوج کی جنگ بندی خلاف ورزیاں روکنے کے اقدامات پر بھی تبادلہ خیال ہوا۔