غزہ:شدید طوفانی بارشیں،پانی گھروں اور خیموں میں داخل،ناقابل برداشت ٹھنڈ سے 8ماہ کی بچی جاں بحق

غزہ(جانوڈاٹ پی کے)غزہ میں مسلسل دوسرے روز  بارش سے  اسرائیلی حملوں سے تباہ حال فلسطینیوں کی مشکلات میں مزید اضافہ ہوگیا، کئی علاقوں میں  سیلابی صورتِ حال پیدا ہوگئی۔

موسم سرما کی بارش سے سردی کی شدت میں مزید اضافہ ہوگیا، بارش کا پانی بے گھر فلسطینیوں کے خیموں میں داخل ہوگیا۔

ناقابلِ برداشت ٹھنڈ سے پناہ گزین خیموں میں موجود 8 ماہ کی بچی جان کی بازی ہار گئی۔  مسلسل بارش سے غزہ شہر میں 5 مخدوش عمارتیں گر گئی۔

جنگ بندی معاہدے کے باوجود غزہ امداد پر اسرائیلی پابندیوں کے باعث 15 لاکھ بےگھر فلسطینی اب بھی بنیادی ضروریات سے محروم ہیں۔

تمام تر مشکلات کے باوجود فلسطینیوں کے حوصلے بلند ہیں۔

فلسطینیوں نے اپنی مدد آپ کے تحت اسرائیلی بمباری سے تباہ عمارتوں کے سریوں سے اپنے لیے عارضی پناہ گاہیں بنانی شروع کر دیں۔