9 مئی واقعات کی ویڈیوز میں سہیل آفریدی اور دیگر کی موجودگی کی تصدیق، پنجاب فرانزک رپورٹ میں انکشاف

پشاور (جانوڈاٹ پی کے) پنجاب فرانزک سائنس لیبارٹری نے پشاور میں 9 مئی کے واقعات کی ویڈیوز کا فریم بہ فریم تجزیہ مکمل کر لیا ہے، جس میں وزیراعلیٰ سہیل آفریدی، کامران بنگش، تیمور جھگڑا اور عرفان سلیم کی موجودگی کی تصدیق کی گئی ہے۔

رپورٹ کے مطابق، پشاور پولیس کی درخواست پر تیار کردہ اس تجزیے میں 16 ویڈیوز اور آڈیو ویژول مواد شامل تھا، جو تھانہ شرقی کی جانب سے بھجوائی گئی یو ایس بی میں موجود تھے۔ فرانزک تجزیے کے دوران متعدد ویڈیوز میں کسی قسم کی ایڈیٹنگ کے شواہد نہیں ملے، تاہم چند ویڈیوز میں افراد اور ٹیکسٹ کے اضافے کی نشاندہی ہوئی۔

رپورٹ میں کہا گیا ہے کہ سہیل آفریدی اور عرفان سلیم کی دو ویڈیوز میں کلپس جوڑنے کے شواہد بھی پائے گئے۔ مزید برآں، سہیل آفریدی، عرفان سلیم، کامران بنگش اور تیمور جھگڑا کی پروفائل تصاویر کو ویڈیوز میں موجود افراد کے ساتھ ملا کر تجزیہ کیا گیا، اور تمام میں مطابقت پائی گئی۔

پنجاب فرانزک لیبارٹری نے واضح کیا کہ یہ تجزیہ صرف ویژول مواد تک محدود رہا اور رپورٹ کی تیاری 19 سے 23 دسمبر 2025 کے دوران مکمل کی گئی۔ انسداد دہشت گردی عدالت نے ریڈیو پاکستان حملہ کیس میں پشاور پولیس سے یہ رپورٹ طلب کی تھی۔