لاہور کینال پر فلوٹنگ ریسٹورنٹس کی تعمیر لاہور ہائیکورٹ میں چیلنج

لاہور (جانوڈاٹ پی کے)لاہور کینال پر فلوٹنگ ریسٹورنٹس کی تعمیر کو لاہور ہائیکورٹ میں آئینی درخواست کے ذریعے چیلنج کر دیا گیا ہے۔ درخواست ڈاکٹر اعجاز انور اور دیگر افراد کی جانب سے دائر کی گئی، جس میں پنجاب حکومت، لاہور ڈیولپمنٹ اتھارٹی (ایل ڈی اے)، اور پبلک ہیلتھ اتھارٹی (پی ایچ اے) سمیت دیگر اداروں کو فریق بنایا گیا ہے۔

درخواست گزاروں نے موقف اختیار کیا کہ کینال کو تجارتی استعمال میں لانا ماحولیاتی قوانین اور تاریخی ورثے کے تحفظ کے اصولوں کی خلاف ورزی ہے۔ فلوٹنگ ریسٹورنٹس سے نہ صرف کینال کے قدرتی بہاؤ پر اثرات مرتب ہو سکتے ہیں بلکہ کناروں پر تجاوزات اور غیر قانونی تعمیرات بھی ہو سکتی ہیں۔

درخواست میں مزید کہا گیا کہ لاہور کینال ایک تاریخی اور ثقافتی ورثہ ہے، اور فلوٹنگ ریسٹورنٹس کی تعمیر سے ماحولیاتی آلودگی میں اضافہ ہو رہا ہے۔ درخواست گزار عدالت سے استدعا کر رہے ہیں کہ فلوٹنگ ریسٹورنٹس کی تعمیر کو کالعدم قرار دیا جائے اور حتمی فیصلہ آنے تک حکم امتناع جاری کیا جائے۔