مریم نواز باکو میں روٹیاں لگا سکتی ہیں، پختونخوا کو گندم کیوں نہیں دے سکتیں؟ گورنر کے پی
پشاور (جانوڈاٹ پی کے)گورنر خیبر پختونخوا فیصل کریم کنڈی نے کہا ہے کہ اگر مریم نواز باکو میں روٹیاں لگا سکتی ہیں تو خیبر پختونخوا کو گندم کیوں نہیں دی جا سکتی۔
میڈیا سے گفتگو کرتے ہوئے انہوں نے کہا کہ صوبے کے حقوق کے لیے گورنر ہاؤس اور وزیراعلیٰ ہاؤس کو مل کر کام کرنا ہوگا اور وہ وفاق اور صوبوں کے درمیان پل کا کردار ادا کرتے رہیں گے۔
فیصل کریم کنڈی نے کہا کہ خیبر پختونخوا کے مسائل کے حل کے لیے تمام سیاسی جماعتوں کو ایک ساتھ بیٹھ کر کام کرنا چاہیے، جبکہ صوبے کو درپیش مشکلات پر سنجیدگی سے توجہ دینے کی ضرورت ہے۔
انہوں نے دعویٰ کیا کہ گندم کی فراہمی پر پابندیاں آئین کی خلاف ورزی کے مترادف ہیں، اور پنجاب سے گندم کی ترسیل میں رکاوٹیں عوام کے لیے مشکلات پیدا کر رہی ہیں۔
گورنر کے مطابق بعض انتظامی رکاوٹوں کی وجہ سے صوبے کو آٹے اور گندم کی فراہمی متاثر ہو رہی ہے، جبکہ انہوں نے سندھ سے گندم کی ترسیل میں حائل رکاوٹیں دور کرنے کا بھی مطالبہ کیا۔
فیصل کریم کنڈی نے کہا کہ خیبر پختونخوا کے پاس پانی، بجلی اور قدرتی وسائل موجود ہیں، اور اگر ان کی درست تقسیم نہ ہوئی تو عوام مزید مشکلات کا شکار ہو سکتے ہیں۔
انہوں نے اس امید کا اظہار کیا کہ وزیراعظم اس مسئلے کو فوری طور پر حل کریں گے تاکہ صوبوں کے درمیان وسائل کی منصفانہ تقسیم یقینی بنائی جا سکے۔
