پاکستان اور آئین کو نہ ماننے والوں سے مذاکرات ممکن نہیں ، فیصل کریم کنڈی

پشاور (جانوڈاٹ پی کے) گورنر خیبر پختونخوا فیصل کریم کنڈی نے کہا ہے کہ جو لوگ پاکستان اور آئین کے اصولوں کو نہیں مانتے، ان سے مذاکرات کرنا ممکن نہیں۔

پشاور میں پریس کانفرنس کرتے ہوئے انہوں نے صوبے میں امن و امان قائم رکھنے کے لیے تمام سٹیک ہولڈرز کو مل کر کام کرنے پر زور دیا اور کہا کہ آئی ڈی پیز کے مسائل کے حل کے لیے اقدامات جاری ہیں، جبکہ قانون نافذ کرنے والے ادارے بھی قیام امن کے لیے بھرپور کوششیں کر رہے ہیں۔

گورنر کے مطابق دہشت گردی کے بعض واقعات میں افغان سرزمین کا استعمال کیا جا رہا ہے اور بعض حملوں میں افغان شہری ملوث پائے گئے ہیں۔ پاکستان نے افغان حکومت کو واضح ثبوت فراہم کیے ہیں، تاہم وزیراعلیٰ کے پی کا سرحد پار جا کر ثبوت طلب کرنا غیر منطقی اور مضحکہ خیز اقدام ہے۔

فیصل کریم کنڈی نے کہا کہ پی ٹی آئی قیادت ہمیشہ منفی بیانات اور انتشار پھیلانے کی پالیسی پر عمل کرتی رہی ہے، اور خیبر پختونخوا میں امن کی صورتحال خراب ہو رہی ہے، جس سے سکیورٹی فورسز اور عام شہری بھی متاثر ہو رہے ہیں۔

انہوں نے مزید کہا کہ اگر صوبے میں امن قائم ہوگا تو ترقی کے تمام وسائل بروئے کار لائے جا سکیں گے اور عوام کی فلاح و بہبود میں اضافہ ہوگا۔

گورنر نے افواج پاکستان اور سکیورٹی اداروں کی قدردانی کرتے ہوئے کہا کہ امن ہی ترقی کی ضامن ہے اور صوبے کو دہشت گردی سے پاک رکھنے کی تمام کوششیں جاری رہیں گی۔