سکیورٹی فورسز کی بروقت کارروائی، کراچی میں دہشت گردی کی بڑی کوشش ناکام

کراچی (جانوڈاٹ پی کے) سکیورٹی فورسز نے بروقت کارروائی کرتے ہوئے کراچی میں دہشت گردی کی ایک بڑی کوشش ناکام بنا دی۔

سکیورٹی حکام کے مطابق بلدیہ کے علاقے رئیس گوٹھ میں بارودی مواد سے بھری ایک گاڑی کو ناکارہ بنا دیا گیا۔ کارروائی کے دوران ایک منی ٹرک سے تقریباً 2000 کلوگرام دھماکہ خیز مواد برآمد کر لیا گیا۔

حکام کا کہنا ہے کہ قریبی کمپاؤنڈ کی تلاشی کے دوران اضافی دیسی ساختہ بارودی مواد بھی ملا، جسے تحویل میں لے لیا گیا ہے۔ ابتدائی تحقیقات کے مطابق یہ بارودی مواد شہر کے ایک بڑے شاپنگ سینٹر ڈولمن مال کو نشانہ بنانے کے لیے استعمال کیا جانا تھا۔

سکیورٹی حکام کے مطابق واقعے میں کوئی جانی نقصان نہیں ہوا، جبکہ علاقے کو گھیرے میں لے کر مزید تحقیقات کا عمل جاری ہے۔ قانون نافذ کرنے والے ادارے اس بات کا تعین کر رہے ہیں کہ بارودی مواد کس نیٹ ورک کے ذریعے شہر میں منتقل کیا گیا۔