پنجاب حکومت: سرکاری محکموں میں پٹرول و ڈیزل گاڑیوں پر پابندی، صرف الیکٹرک و ہائبرڈ گاڑیاں خریدی جائیں گی
لاہور (جانوڈاٹ پی کے) پنجاب حکومت نے سرکاری محکموں میں ماحول دوست ٹرانسپورٹ کے فروغ کے لیے بڑا فیصلہ کرتے ہوئے پٹرول اور ڈیزل گاڑیوں کی خریداری پر مکمل پابندی عائد کر دی ہے۔
وزیراعلیٰ پنجاب مریم نواز شریف نے اس پابندی کی باقاعدہ منظوری دے دی ہے۔ حکومت کے مطابق آئندہ صرف الیکٹرک یا ہائبرڈ گاڑیاں خریدی جا سکیں گی، جبکہ فیلڈ ڈیوٹی پر مامور گاڑیاں اس پابندی سے مستثنیٰ ہوں گی۔ نئی الیکٹرک وہیکل پالیسی 2026 جلد متعارف کرائی جائے گی۔
اسی سلسلے میں پنجاب حکومت نے 31 شہروں میں 170 نئے پٹرول پمپس کے این او سی بھی جاری کر دیے ہیں۔ نئے این او سی کی منظوری اب اس شرط سے مشروط ہے کہ ہر پٹرول پمپ پر الیکٹرک چارجنگ یونٹ نصب ہو، ورنہ کام کرنے کی اجازت نہیں دی جائے گی۔
ترجمان پنجاب حکومت نے کہا کہ ماحولیاتی تحفظ کے لیے گرین انرجی کو فروغ دینا ترجیح ہے اور صوبہ میں نئی الیکٹرک وہیکل پالیسی جلد متعارف کرائی جائے گی۔
تفصیلات کے مطابق فیصل آباد میں 29، لاہور 14، بہاولپور 10، خانیوال اور بہاولنگر میں 9، راولپنڈی اور جھنگ میں 8، جبکہ ٹوبہ ٹیک سنگھ، میانوالی، قصور اور چنیوٹ میں 7 نئے پٹرول پمپس کو الیکٹرک چارجنگ یونٹ نصب کرنے کی شرط پر این او سی دی گئی ہے۔
