آسٹریلیا میں صارفین کیلئے روازنہ 3گھنٹے مفت بجلی کی بڑی سہولت کا اعلان

میلبرن (جانوڈاٹ پی کے) صارفین کیلئے روزانہ تین گھنٹے مفت بجلی کی بڑی سہولت کا اعلان کرتے ہوئے کہا گیا ہے کہ تین گھنٹے جتنی چاہے بجلی استعمال کرو۔ بل نہیں آئے گا۔

تفصیلات کے مطابق آسٹریلیا کی حکومت نے ایک نیا پروگرام متعارف کرانے کا اعلان کیا ہے جس کے تحت تین ریاستوں کے گھروں کو روزانہ تین گھنٹے مفت بجلی فراہم کی جائے گی۔

یہ منصوبہ "سولر شیئر آفر” کہلاتا ہے اور جولائی 2026 سے شروع کیا جائے گا، اس کا مقصد عوام کو دوپہر کے اوقات میں زیادہ بجلی استعمال کرنے کی ترغیب دینا ہے، جب سورج کی روشنی سے پیدا ہونے والی توانائی سب سے زیادہ دستیاب ہوتی ہے۔

آسٹریلوی حکام کا کہنا ہے شہریوں کو روزانہ تین گھنٹے مفت سولر بجلی ملے گی، جس سے ایئرکنڈیشنر، ہیٹر، واشنگ مشین، اوون اور الیکٹرک گاڑی کی چارجنگ بھی بغیراضافی خرچ کے ممکن ہوگی۔

حکام نے مزید کہا کہ تین گھنٹے کے دوران شہری جتنی چاہیں بجلی استعمال کریں، کوئی اضافی چارج لگے گا نہ بل آئے گا، آسٹریلیا میں سورج کی روشنی اور ہوا سے بجلی کی پیداوار مقررہ ہدف سے بڑھ گئی ہے، اسی لیے نظام میں جمع فالتوبجلی مفت تقسیم کی جائےگی۔

توانائی کے وزیر کرس بون نے کہا یہ اقدام نہ صرف عوام کو فائدہ دے گا بلکہ گرِڈ پر دباؤ بھی کم کرے گا، "ہم ایک سولر قوم ہیں، ہمارے 42 لاکھ سے زیادہ گھروں کی چھتوں پر سولر پینل نصب ہیں۔”

مفت بجلی حاصل کرنے کا طریقہ

اس سہولت سے فائدہ اٹھانے کے لیے صارفین کے گھروں میں سمارٹ میٹر نصب ہونا ضروری ہے، اگر کسی کے پاس سمارٹ میٹر نہیں ہے تو وہ اپنی بجلی کی کمپنی سے مفت تنصیب کی درخواست دے سکتا ہے۔

مختلف کمپنیوں کے سولر شیئر پلانز ہوں گے جن کے لیے آسٹریلین انرجی ریگولیٹر کم سے کم شرائط طے کرے گا۔

سب سے زیادہ فائدہ کن گھروں کو ہوگا؟

یہ منصوبہ ان گھروں کے لیے زیادہ مؤثر ہے جو دن کے وقت بجلی زیادہ استعمال کرتے ہیں، مثلاً:

گھر سے کام کرنے والے افراد

ریٹائرڈ شہری

یا وہ لوگ جن کے پاس سمارٹ آلات ہیں جو خودکار طور پر دوپہر میں چل سکتے ہیں۔