ٹیکس مقدمات سے متعلق انقلابی فیصلہ،چیف جسٹس نے بڑا حکم جاری کردیا

اسلام آباد (جانوڈاٹ پی کے)چیف جسٹس پاکستان یحییٰ آفریدی نے کہا ہے کہ قومی معیشت پر اثر ڈالنے والے ٹیکس مقدمات کے فوری فیصلے آئندہ عدالتی ترجیح ہوں گے۔

چیف جسٹس کی زیر صدارت ایک اعلیٰ سطح اجلاس میں اہم ٹیکس مقدمات کے جلد فیصلوں کی حکمتِ عملی پر غور کیا گیا، جس میں جسٹس میاں گل حسن اورنگزیب، چیئرمین ایف بی آر، ممبر لیگل ایف بی آر اور دیگر اعلیٰ حکام نے شرکت کی۔ اجلاس کے بعد اعلامیہ جاری کیا گیا۔

اعلامیے کے مطابق چیف جسٹس یحییٰ آفریدی نے کہا کہ طویل المدتی ٹیکس مقدمات نہ صرف مالی وسائل کی دستیابی کو محدود کرتے ہیں بلکہ سرمایہ کاروں کے اعتماد کو بھی متاثر کرتے ہیں۔ انہوں نے واضح کیا کہ قومی معیشت پر اثر ڈالنے والے ٹیکس کیسز کے فوری فیصلے عدالتی ترجیح ہوں گے، کیونکہ ٹیکس مقدمات میں تاخیر سرمایہ کاری اور معاشی استحکام کے لیے نقصان دہ ہے۔

اعلامیے میں مزید کہا گیا کہ طویل عرصے سے زیر التوا اور بھاری مالیت کے ٹیکس تنازعات کے حل پر تفصیلی غور کیا گیا اور زیادہ مالیت کے ٹیکس کیسز کو ترجیحی بنیادوں پر نمٹانے پر اتفاق کیا گیا۔ اجلاس میں عدلیہ اور ٹیکس حکام کے درمیان بہتر رابطہ، ہم آہنگی اور ٹیکس مقدمات میں یکسانیت کے لیے ادارہ جاتی اصلاحات پر بھی زور دیا گیا۔