سوشل میڈیا کاؤنٹس،اے ٹی ایم واپس کریں!ڈکی بھائی کی استدعا پر عدالت نے بیان حلفی مانگ لیا

لاہور(جانوڈاٹ پی کے)یوٹیوبر ڈکی بھائی کی مشکلات کم نہیں ہو سکیں،ہر گزرتے دن کیساتھ وہ پھنستے ہی چلے جا رہے  ہیں۔لاہورکی مقامی عدالت میں  یوٹیوبرسعد الرحمان عرف ڈکی بھائی کے سوشل میڈیا اکاؤنٹس ،اے ٹی ایم کارڈز کی سپرداری کی درخواست پرسماعت ہوئی جس دوران عدالت نے ڈکی بھائی کو بیان حلفی جمع کرانے کی ہدایت کردی۔

جوڈیشل مجسٹریٹ نعیم وٹو نے یوٹیوبرڈکی بھائی کی درخواست پرسماعت کی۔ ملزم سعد الرحمان عرف ڈکی بھائی نےاپنی چیزیں واپس لینے کے لئےاستدعا کی۔ دوران سماعت این سی سی آئی اے نے سپرداری سے متعلق  رپورٹ جمع کرادی۔

وکیل این سی سی آئی اے نے بتایا کہ سپرداری سے متعلق تمام سامان این سی سی آئی اے کی تحویل میں ہے،عدالت نے ڈکی بھائی کے وکیل سے استفسارکرتے ہوئے پوچھا اگر ڈکی بھائی کا اکاؤنٹ استعمال میں نہیں تو ویڈیو اپلوڈ کیسے ہوئی،  بیان حلفی میں واضح کریں  اکاؤنٹ کی کس حد تک رسائی آپ کے پاس ہے۔یہ بھی  واضح کریں اکاؤنٹ سے اپلوڈ ہونے والی ویڈیو سے کوئی کمائی نہیں ہو رہی۔عدالت نے سماعت بیس دسمبر تک ملتوی کردی۔این سی سی آئی اے نے یوٹیوبر ڈکی بھائی سمیت دیگر کے خلاف چالان جمع کرا رکھا ہے۔