روسی تیل کی خریداری:ٹرمپ نے بھارت کو ٹیرف بڑھانے کی دھمکی دے دی

واشنگٹن(مانیٹرنگ ڈیسک) امریکی صدر ڈونلڈ ٹرمپ نے روسی تیل کے معاملے پر تعاون نہ کرنے کی صورت میں بھارت پر ٹیرف بڑھانے کی دھمکی دے دی ہے۔

غیر ملکی خبر رساں ادارے کے مطابق صدر ٹرمپ کا کہنا ہے کہ واشنگٹن، روسی تیل کے حوالے سے نئی دہلی کے مؤقف اور اقدامات کا باریک بینی سے جائزہ لے رہا ہے۔ انہوں نے خبردار کیا کہ اگر بھارت روسی تیل کے معاملے پر امریکا کے ساتھ تعاون نہیں کرتا تو اس پر درآمدی ٹیرف میں اضافہ کیا جا سکتا ہے۔

امریکی صدر کا یہ بیان ایسے وقت سامنے آیا ہے جب امریکا اور بھارت کے درمیان تجارتی مذاکرات جاری ہیں۔ اس سے قبل صدر ٹرمپ یہ دعویٰ بھی کر چکے ہیں کہ بھارتی وزیر اعظم نریندر مودی نے انہیں یقین دہانی کرائی تھی کہ بھارت روس سے تیل کی خریداری بند کر دے گا۔

تاہم صدر ٹرمپ کے اس دعوے پر بھارتی حکومت کی جانب سے اب تک کوئی باضابطہ تصدیق یا تردید سامنے نہیں آئی۔ ماہرین کے مطابق روسی تیل کا معاملہ امریکا اور بھارت کے تعلقات میں ایک نیا تناؤ پیدا کر سکتا ہے۔