طویل عرصے سے انتظار ختم، مریم نواز ہسپتال میں ڈینٹل یونٹ کی تنصیب شروع

وزیرآباد(جانوڈاٹ پی کے) اخبارات  کی خبر پر فوری ایکشن، مریم نواز ہسپتال میں ڈینٹل یونٹ کی تنصیب شروع۔علی پور چٹھہ کے مریم نواز ہسپتال میں ڈینٹل یونٹ کی عدم موجودگی کے حوالے سے اخبارات میں شائع ہونے والی خبر نے فوری اثر دکھا دیا۔ خبر شائع ہوتے ہی ڈپٹی کمشنر گوجرانوالہ نے معاملے کا نوٹس لیتے ہوئے ہسپتال میں ڈینٹل یونٹ کی تنصیب کا کام فوری طور پر شروع کروا دیا۔ میں عوامی مسئلہ اجاگر کیے جانے کے بعد ضلعی انتظامیہ حرکت میں آ گئی اور مریم نواز ہسپتال میں ڈینٹل سہولیات کی بحالی کے لیے عملی اقدامات کا آغاز کر دیا گیا۔ ڈینٹل یونٹ کی تنصیب کا کام شروع ہونے پر شہریوں میں خوشی کی لہر دوڑ گئی، جو طویل عرصے سے دانتوں کے علاج کے لیے پرائیویٹ مہنگے کلینکس کا رخ کرنے پر مجبور تھے۔ علاقہ مکینوں اور مریضوں نے اس پیش رفت کو عوامی مسائل کے حل کی جانب اہم قدم قرار دیتے ہوئے روزنامہ نوائے وقت کا خصوصی طور پر شکریہ ادا کیا۔ شہریوں کا کہنا ہے کہ قومی سطح کے جریدے نے ان کے دیرینہ مسئلے کی بروقت نشاندہی کی، جس کے نتیجے میں ضلعی انتظامیہ نے فوری ایکشن لیا اور عوام کو ریلیف ملا۔ شہریوں نے امید ظاہر کی ہے کہ ڈینٹل یونٹ جلد مکمل طور پر فعال ہو جائے گا اور مستقبل میں بھی روزنامہ نوائے وقت اسی طرح عوامی مسائل کی ترجمانی کرتا رہے گا۔