سی ٹی ڈی پنجاب میں کارروائی، بھارتی ایجنٹ سمیت 49 دہشت گرد گرفتار

لاہور (جانوڈاٹ پی کے) دہشت گردی کے خدشات کے پیش نظر کاؤنٹر ٹیررازم ڈیپارٹمنٹ (CTD) نے پنجاب کے مختلف شہروں میں کامیاب آپریشنز کیے، جن کے دوران بھارتی خفیہ ایجنسی کے ایجنٹ سمیت 49 دہشت گردوں کو گرفتار کیا گیا۔

حکام کے مطابق لاہور، راولپنڈی، جہلم، ٹوبہ ٹیک سنگھ، حافظ آباد، چکوال، گوجرانوالہ، ڈیرہ غازی خان اور فیصل آباد میں آپریشنز کیے گئے۔ لاہور سے بھارتی خفیہ ایجنسی ’را‘ کا ایجنٹ مجتبیٰ گرفتار ہوا، جس کے قبضے سے بارودی مواد، اسلحہ اور اہم سرکاری و حساس عمارتوں کے نقشے برآمد ہوئے۔

گرفتار دہشت گردوں کے قبضے سے دھماکہ خیز مواد اور خودکش جیکٹ بنانے کا سامان بھی برآمد ہوا، جبکہ ابتدائی تحقیقات کے مطابق یہ دہشت گرد عوام میں خوف و ہراس پھیلانے کے لیے مختلف کارروائیاں کرنے کی منصوبہ بندی کر رہے تھے۔

CTD حکام کے مطابق گزشتہ ایک ماہ کے دوران صوبے بھر میں 6 ہزار 131 کومبنگ آپریشنز کیے گئے، جن میں 599 مشتبہ افراد کو گرفتار کیا گیا اور 2 لاکھ 43 ہزار 546 افراد سے پوچھ گچھ کی گئی۔

حکام نے کہا کہ دہشت گردی کے خطرات کے پیش نظر انٹیلی جنس بیسڈ آپریشنز کو مزید تیز کیا جائے گا تاکہ عوام کی حفاظت یقینی بنائی جا سکے۔