لکی مروت: سی ٹی ڈی اور پولیس کی کارروائی 3 دہشت گرد ہلاک، بھاری اسلحہ برآمد

پشاور (جانوڈاٹ پی کے) خیبرپختونخوا کے ضلع لکی مروت میں سی ٹی ڈی بنوں ریجن اور پولیس نے مشترکہ انٹیلی جنس بیسڈ کارروائی کے دوران 3 دہشت گردوں کو ہلاک کر دیا۔

سی ٹی ڈی حکام کے مطابق یہ کارروائی پولیس سٹیشن نورنگ کی حدود میں انجام دی گئی۔ ہلاک دہشت گردوں میں ٹارگٹ کلر محمد عرف مجاہد، خاجی فواد اللہ عرف معاذ اور افنان خان عرف افنانی شامل ہیں۔

حکام کا کہنا ہے کہ ہلاک دہشت گرد پولیس پر حملوں، قتل اور اقدام قتل سمیت متعدد دہشت گردی کے مقدمات میں مطلوب تھے۔ کارروائی کے دوران دہشت گردوں سے کلاشنکوف، دو 9 ایم ایم پسٹل، موبائل فونز اور کالعدم تنظیم کے کارڈز بھی برآمد ہوئے۔

آئی جی خیبرپختونخوا اور ایڈیشنل آئی جی سی ٹی ڈی نے سی ٹی ڈی اور لکی مروت پولیس کی کارکردگی کو سراہا۔ آئی جی کے پی نے کہا کہ معاشرے کے ناسور دہشت گردوں کے لیے خیبرپختونخوا کی سرزمین تنگ ہو چکی ہے اور دہشت گردی کے خلاف کارروائیاں آخری خارجی کے خاتمے تک جاری رہیں گی۔