کاؤنٹر ٹیررازم ڈیپارٹمنٹ کے دائرہ اختیار میں توسیع، جنوبی پنجاب کے اضلاع بھی شامل
لاہور(جانوڈاٹ پی کے) وزیراعلیٰ پنجاب کے وژن ’محفوظ پنجاب‘کے تحت کاؤنٹر ٹیررازم ڈیپارٹمنٹ (سی ٹی ڈی) کے دائرہ اختیار میں توسیع کر دی گئی ہے۔ صوبائی کابینہ کی منظوری کے بعد تحصیل کوہِ سلیمان اور ڈیرہ غازی خان کو سی ٹی ڈی کے دائرہ اختیار میں شامل کیا گیا ہے۔
اس فیصلے کے تحت تحصیل راجن پور بھی سی ٹی ڈی ڈیرہ غازی خان کے دائرہ اختیار میں شامل کردی گئی ہے۔ اب سی ٹی ڈی ڈیرہ غازی خان کا دائرہ اختیار ڈی جی خان پولیس ریجن کے تمام اضلاع تک محیط ہوگا، جس میں ڈیرہ غازی خان، مظفرگڑھ، لیہ اور راجن پور شامل ہیں۔
محکمہ داخلہ کی سفارش اور کابینہ کی منظوری کے بعد جاری نوٹیفکیشن نے 27 ستمبر 2019 کے سابقہ نوٹیفکیشن میں ترمیم کر دی ہے، جس کا مقصد جنوبی پنجاب میں امن و امان کو مزید مؤثر بنانا بتایا گیا ہے۔
