بھارتی ایما پر دہشت گرد بلوچستان کی ترقی سبوتاژ کرنا چاہتے ہیں، کور کمانڈر کوئٹہ
کوئٹہ (جانوڈاٹ پی کے)کور کمانڈر کوئٹہ نے کہا ہے کہ بھارت کی ایما پر سرگرم دہشت گرد عناصر بلوچستان کے ترقیاتی منصوبوں کو نشانہ بنا کر صوبے میں عدم استحکام پیدا کرنے کی کوشش کر رہے ہیں۔
کور کمانڈر کوئٹہ نے بلوچستان کے علاقے بسیمہ میں مقامی افراد سے ملاقات کی، جہاں انہوں نے تاجروں، اساتذہ، معززین اور نوجوانوں سمیت مختلف مقامی اسٹیک ہولڈرز سے تفصیلی بات چیت کی۔ بسیمہ کی مقامی آبادی نے عوام سے براہِ راست رابطے پر کور کمانڈر کوئٹہ کا شکریہ ادا کیا اور اس ملاقات کو مسائل کے حل کی جانب ایک مثبت قدم قرار دیا۔
اس موقع پر کور کمانڈر کوئٹہ نے کہا کہ پاک فوج سول انتظامیہ کے ساتھ مل کر ترقیاتی منصوبے جاری رکھے ہوئے ہے، جن کا بنیادی مقصد مقامی آبادی کو بہتر سہولیات فراہم کرنا اور معیارِ زندگی کو بلند کرنا ہے۔
انہوں نے بھارتی سرپرستی میں دہشت گردوں کی جانب سے کیے جانے والے منفی پروپیگنڈے کو دو ٹوک انداز میں مسترد کرتے ہوئے کہا کہ دشمن عناصر عوام کو بہتر زندگی سے محروم رکھنے اور علاقے کے امن کو نقصان پہنچانے کی سازشیں کر رہے ہیں۔
کور کمانڈر کوئٹہ نے واضح کیا کہ پاک فوج مقامی آبادی کے تعاون سے بلوچستان میں امن، ترقی اور خوشحالی کو ہر صورت یقینی بنائے گی۔
