پنجاب میں 16 جنوری تک شدید سردی کی پیش گوئی، لاہور میں درجہ حرارت 3 ڈگری ریکارڈ

لاہور(جانوڈاٹ پی کے) پنجاب میں 16 جنوری تک شدید سردی کی لہر جاری رہنے کی پیش گوئی کر دی گئی ہے، جبکہ آج صبح لاہور میں کم سے کم درجہ حرارت 3 ڈگری سینٹی گریڈ ریکارڈ کیا گیا۔

پروونشل ڈیزاسٹر مینجمنٹ اتھارٹی (پی ڈی ایم اے) پنجاب کے مطابق راولپنڈی، مری، گلیات اور پوٹھوہار ریجن میں شدید سردی کے ساتھ برفباری کے امکانات موجود ہیں۔ اس صورتحال کے پیش نظر ٹورازم، ایجوکیشن، ہیلتھ، زراعت، لوکل گورنمنٹ، فاریسٹ، سی اینڈ ڈبلیو، ٹرانسپورٹ، ریسکیو 1122، نیشنل ہائی وے اتھارٹی اور پولیس سمیت متعلقہ محکموں کو الرٹ رہنے کی ہدایت جاری کر دی گئی ہے۔

ڈی جی پی ڈی ایم اے عرفان علی کاٹھیا نے بتایا کہ آئندہ دنوں میں دھند اور اسموگ کی صورتحال میں بھی اضافہ متوقع ہے۔ انہوں نے تعلیمی اداروں کو ہدایت کی کہ طلبہ و طالبات کو سردی سے بچاؤ کے لیے مناسب لباس سے متعلق آگاہ کریں اور کلاس رومز میں سردی سے بچاؤ کے مؤثر انتظامات یقینی بنائے جائیں۔

ڈی جی پی ڈی ایم اے کے مطابق تمام سرکاری و نجی اسپتالوں، بالخصوص بنیادی صحت مراکز میں ادویات اور طبی عملے کی دستیابی کو یقینی بنایا جائے۔ عوام الناس سے اپیل کی گئی ہے کہ سردی کی شدت سے خود کو محفوظ رکھیں، ماسک کا استعمال کریں اور غیر ضروری طور پر گھروں سے باہر نکلنے سے گریز کریں۔

انہوں نے مزید بتایا کہ پی ڈی ایم اے کنٹرول روم میں صورتحال کی 24 گھنٹے نگرانی جاری ہے۔ شہریوں کو خراب موسمی حالات میں غیر ضروری سفر سے اجتناب جبکہ سیاحوں کو احتیاطی تدابیر اختیار کرنے اور جاری کردہ ہدایات پر عمل کرنے کی تلقین کی گئی ہے۔ مری میں سیاحوں کی سہولت کے لیے مختلف مقامات پر فسیلیٹیشن سینٹرز قائم کیے گئے ہیں۔

محکمہ موسمیات کے مطابق لاہور سمیت پنجاب بھر میں دھند اور بادلوں کا راج برقرار ہے، جس کے باعث سورج کی کرنیں زمین تک نہیں پہنچ پا رہیں اور سردی کی شدت میں اضافہ ہو گیا ہے۔ لاہور میں زیادہ سے زیادہ درجہ حرارت 13 ڈگری سینٹی گریڈ تک جانے کا امکان ہے، جبکہ آئندہ دو سے تین روز تک بارش کا کوئی امکان نہیں اور موسم خشک و سرد رہے گا۔