چین امریکہ تعلقات میں بڑا بریک تھرو:چین نے نایاب معدنیات کی امریکا کو برآمد پر پابندی ہٹا دی

 بیجنگ (مانیٹرنگ ڈیسک)امریکہ صدر ڈونلڈ ٹرمپ اور چین کے صدر شی جین کے مابین ہونے والی ملاقات کے بعد برف پگھلنا شروع ہو گئی ہے چین نے نایاب معدنیات کی امریکا کو برآمد پر لگائی پابندی عارضی طور پر ہٹا دی۔ یہ پابندی ایک سال کیلئے معطل کی گئی ہے۔

پہلے مرحلے میں گیلئم، جرمانیم، اینٹمونی اور سپر ہارڈ میٹریلز سے متعلق ’’ڈوئل یوز‘‘ یعنی دوہرے استعمال کی اشیاء کی برآمد پر عائد پابندی کو معطل کر دیا ہے۔

چینی وزارتِ تجارت کے مطابق یہ معطلی  27 نومبر 2026 تک برقرار رہے گی۔وزارت نے اپنے بیان میں مزید تفصیلات فراہم نہیں کیں، تاہم بتایا کہ ان اشیاء کی برآمد پر پابندی دسمبر 2024 میں نافذ کی گئی تھی۔

چین نے ان دیگر برآمدی پابندیوں کو بھی عارضی طور پر ختم کرنے کا اعلان کیا جو 9 اکتوبر کو مخصوص نایاب معدنیات اور لیتھیئم بیٹریوں کے مواد پر عائد کی گئی تھیں۔

یہ فیصلہ ایسے وقت میں سامنے آیا ہے جب  چینی صدر شی جن پنگ  اور امریکی صدر ڈونلڈ ٹرمپ نے تجارتی تنازعات میں کمی لانے کے لیے ایک سال کے لیے ٹیرف میں نرمی اور دیگر تجارتی اقدامات کو مؤخر کرنے پر اتفاق کیا ہے۔

ماہرین  نے کہا کہ چین کا یہ اقدام بیجنگ اور واشنگٹن کے درمیان جاری اقتصادی کشیدگی میں ایک نیا موڑ ثابت ہو سکتا ہے، خصوصاً ایسے وقت میں جب عالمی منڈی نایاب دھاتوں اور بیٹریوں کے مواد پر انحصار کے باعث غیر یقینی کیفیت کا شکار ہے۔