بشریٰ بی بی کی بیٹی کا والدہ سے ملاقات کے لیے لاہور ہائیکورٹ سے رجوع

لاہور(جانوڈاٹ پی کے) بانی پاکستان تحریکِ انصاف کی اہلیہ بشریٰ بی بی کی بیٹی نے اڈیالہ جیل میں والدہ سے ملاقات کے لیے لاہور ہائیکورٹ سے رجوع کر لیا ہے۔

درخواست گزار مبشرہ خاور مانیکا نے صدر لاہور ہائیکورٹ بار آصف نسوانہ کے توسط سے عدالت میں درخواست دائر کی، جس میں پنجاب حکومت، سپرنٹنڈنٹ اڈیالہ جیل اور دیگر متعلقہ حکام کو فریق بنایا گیا ہے۔

درخواست میں مؤقف اختیار کیا گیا ہے کہ بشریٰ بی بی اس وقت اڈیالہ جیل میں قید ہیں اور درخواست گزار ان کی حقیقی بیٹی ہے۔ درخواست کے مطابق جیل قواعد و ضوابط کے تحت قیدی کو اپنے اہلِ خانہ سے ملاقات کا حق حاصل ہے۔

درخواست گزار نے مؤقف اپنایا کہ جیل شیڈول کے مطابق ہر منگل کو اہلِ خانہ سے ملاقات کا دن مقرر ہے، تاہم متعدد کوششوں کے باوجود سپرنٹنڈنٹ اڈیالہ جیل کی جانب سے والدہ سے ملاقات کی اجازت نہیں دی جا رہی۔

درخواست میں عدالت سے استدعا کی گئی ہے کہ سپرنٹنڈنٹ اڈیالہ جیل کو فوری طور پر والدہ سے ملاقات کرانے کے احکامات جاری کیے جائیں۔