پاک افغان سرحد تجارتی سرگرمیوں کیلئے کھول دی گئی

اسلام آباد(جانو ڈاٹ پی کے)پاکستان اور افغانستان کے درمیان سپین بولدک بارڈر کراسنگ دوبارہ کھول دی گئی ہے۔ ذرائع کے مطابق فی الحال سرحد صرف تجارتی سرگرمیوں کیلئے کھولی گئی ہے۔ذرائع کا کہنا ہے کہ چند حساس معاملات کے باعث عام شہریوں کی پیدل آمدورفت کی اجازت تاحال نہیں دی گئی۔سرحد کے دونوں جانب ٹریڈ کراسنگ اور کلیئرنس سے متعلقہ حکام اپنی ذمہ داریاں سنبھال چکے ہیں۔ آج صرف خالی ٹرکوں کو داخلے کی اجازت دی گئی ہے ۔افغان ڈرائیورز کیلئے پاسپورٹ اور ویزا لازمی قرار دیا گیا ہے۔

ذرائع کے مطابق کل انہی شرائط پر طورخم بارڈر بھی کھولا جائے گا، جس سے متعلق افغان ایمبیسی اسلام آباد کو مراسلہ ارسال کر دیا گیا ہے۔ دیگر تین کراسنگ پوائنٹس  غلام خان، انگور اڈہ اور خرلاچی  فی الحال غیر فعال رہنے کا امکان ہے۔

یاد رہے کہ افغان طالبان کی جانب سے 11 اور 12 اکتوبر کی شب پاکستانی سرحد پر بلااشتعال فائرنگ کی گئی جس کا پاک فوج کی جانب سے بھر پور اور شدید جواب دیا گیا، جس میں افغان طالبان اور فنتہ الخوارج کے 200 سے زائد دہشتگرد مارے گئے جبکہ پاک فوج نے متعدد چیک پوسٹوں کو تباہ کر دیا ۔

افغان طالبان کی درخواست پر پاکستان نے 15 اکتوبر کو سیز فائر پر رضامندی ظاہر کی جو کہ 48 گھنٹوں کیلئے نافذ کیا گیا، جس کے بعد اس میں مزید توسیع کی گئی، 18 اکتوبر کو پاکستان اور افغان طالبان کے درمیان دوحا میں مذاکرات کا آغاز ہوا جس دوران سیز فائر کے معاہدے پر اتفاق کیا گیا۔