پاکستان میں مہنگائی میں نمایاں کمی، پالیسی استحکام سے معاشی ماحول بہتر، بلومبرگ رپورٹ

نیویارک(جانوڈاٹ پی کے)عالمی مالیاتی اعداد و شمار کیلئے مستند ترین ادارے بلومبرگ نے پاکستان سے متعلق رپورٹ جاری کر دی ہے جس میں پاکستان میں مہنگائی میں نمایاں کمی اور پالیسی استحکام کی تصدیق کی گئی ہے ۔

بلومبرگ کا رپورٹ میں کہناتھا کہ پاکستان میں قیمتوں کا استحکام اور معاشی نظم و نسق بہتر ہو رہا ہے، دسمبر میں افراطِ زر 5.6 فیصد رہا جو توقعات اور نومبر کے  6.1  فیصد سے کم ہے،  خوراک کی قیمتوں میں دباؤکم ہوا اور غذائی افراطِ زر 3.24 فیصد تک محدود رہا۔

رپورٹ میں کہا گیاہے کہ خوراک کی بہتر دستیابی سے مارکیٹ میں استحکام آیا،عوامی ریلیف کے آثار نمایاں ہوئے، مارکیٹ اندازوں سے کم مہنگائی نے اعتماد بڑھایا اور پالیسی سمت کی تصدیق کی،  اسٹیٹ بینک نے استحکام کو مدنظر رکھتے ہوئے پالیسی ریٹ 3سال کی کم ترین سطح پر کیا۔

بلومبرگ کے مطابق شرحِ سودمیں 50 بیسس پوائنٹس کمی سے قیمتوں کے قابلِ کنٹرول ہونے کا واضح اشارہ ملا، کم شرحِ سود سے کاروبار اور سرمایہ کاری کیلئے فنانسنگ نسبتاً سازگار ہونے کی امید بڑھی، قیمتوں کے استحکام نے سرمایہ کاری کے ماحول کیلئے مثبت سگنل دیا۔

کم مہنگائی سے قوتِ خرید میں بہتری اور صارفین کیلئے ریلیف کے امکانات بڑھے، دسمبر کے اعداد و شمار سے ظاہر ہوا پالیسی اقدامات کے نتائج سامنے آنا شروع ہو گئے ہیں، مہنگائی کا مسلسل نیچے آنا معاشی استحکام اور بہتر گورننس کی بنیاد مضبوط ہونے کا اشارہ ہے۔