بے نظیر انکم سپورٹ پروگرام: مارچ 2026 سے ایک کروڑ مستحقین کو ڈیجیٹل والٹ کے ذریعے ادائیگیاں

اسلام آ باد(جانوڈاٹ پی کے)بے نظیر انکم سپورٹ پروگرام کے ایک کروڑ مستحقین کیلئے اچھی خبر  یہ ہے کہ مستحقین کو مارچ 2026 سے ڈیجیٹل والٹ کے ذریعے گھر بیٹھے ادائیگیاں ہوں گی۔

یہ اعلا ن وفاقی وزیر تخفیف غربت عمران احمد شاہ کی جانب سے پینل چیئر مین علی زاہد کی زیر صدارت قومی اسمبلی کے اجلاس میں شر میلا فاروقی کے سوال کا جواب دیتے ہوئے کیا گیا۔

وفاقی وزیر تخفیف غربت عمران احمد شاہ  نے بتایا کہ مستحقین کو مارچ 2026 سے ڈیجیٹل والٹ کے ذریعے گھر بیٹھے ادائیگیاں ہوں گی،  اس سے کرپشن کا خاتمہ ہوگا اور خواتین کو قطاروں میں لگنے سے نجات ملے گی، ایک کروڑ اکاؤنٹ بن چکے ہیں، فون سمیں تقسیم ہونی ہیں۔

عمران احمد شاہ کا کہنا تھا کہ  بے نظیر انکم سپورٹ پروگرام اور پاکستان بیت المال کے درمیان 2023 میں معاہدہ ہوا ہے جس کے تحت ڈیٹا شئیرنگ ہوتی ہے، 40 ہزار کیسز چیک ہوئے جن  میں 8 ہزار ڈبل تھےجنہیں نکال دیاگیا ہے  جب کہ  آگےچل کر مزید بہتری آئے گی۔

دوران اجلاس پی پی رہنما شر میلا فاروقی نے مطالبہ کیا کہ  حکومت بے نظیر انکم سپورٹ پروگرام کے بجٹ میں اضافہ کرے۔

اس پر عمران احمد شاہ نے بتایا کہ حکومتی زرمبادلہ کے ذخائر کا وزارتوں کو شیئر نہیں ملتا، بے نظیر انکم سپورٹ پروگرام کیلئے حکومت نے 716ارب روپے مختص کیے ہیں۔