باقی صوبوں میں الیکشن ہوگئے،پنجاب میں کیوں نہیں ہو رہے؟ضمنی الیکشن میں ہم سے ایک سیٹ چھینی گئی،بلاول بھٹو
پی ٹی آئی کا کوئی مستقبل نہیں،چیئرمین پاکستان پیپلز پارٹی کا گورنر ہاؤس لاہور میں عشائیہ سے خطاب
لاہور(جانو ڈاٹ پی کے)چئیرمین پیپلزپارٹی بلاول بھٹو زرداری کا پیپلزپارٹی کے رہنماؤں کے اعزاز میں گورنر ہاؤس لاہور میں عشائیہ۔عشائیہ میں پیپلزپارٹی کے اراکین قومی و صوبائی اسمبلی ٹکٹ ہولڈرزاورعہدیداران نے بھی شرکت کی۔عشائیہ میں پیپلزپارٹی کے اراکین قومی اسمبلی راجہ پرویز اشرف، مرتضیٰ محمود،طاہر رشید،ثمنہ گھرنے بھی شرکت۔
چئیرمین پیپلزپارٹی بلاول بھٹو زرداری نے عشائیہ سے خطاب کرتے ہوئے کہا کہ ضمنی الیکشن میں ایک نشست ہم نے جیتی ایک ہم سے چھین لی گئی،پنجاب میں بلدیاتی الیکشن آنے والے ہیں پیپلزپارٹی کے رہنما اور کارکن بلدیاتی الیکشن کی تیاری کریں،آئندہ بلدیاتی الیکشن میں ہمیں فرنٹ فٹ پر آکر کھلنا ہو گا،باقی صوبوں میں بلدیاتی الیکشن ہو گئے پنجاب میں کیوں نہیں ہو رہے؟
چئیرمین پیپلزپارٹی بلاول بھٹو زرداری نے کہا کہ پی ٹی آئی کا کوئی مستقبل نہیں ہے،بحثیت جماعت سب کو سیاست کرنے کا حق ہے،ملک دشمن اور اداروں کے خلاف بولنے والوں کو سیاست کرنے کا کوئی حق نہیں ہے۔انہوں نے کہا کہ میں اب لاہور مختصر دورے پر آیا ہوں اس کے بعد لاہور کا طویل دورہ کروں گا۔
