امریکہ : نجی بزنس جیٹ ٹیک آف کے دوران حادثے کا شکار، 8 افراد سوار تھے

بینگر \ مائن (ویب ڈیسک) امریکی ریاست مائن کے شہر بینگر میں ایک نجی بزنس جیٹ Bombardier Challenger 650 ٹیک آف کے دوران حادثے کا شکار ہو گیا۔ طیارے میں کل آٹھ افراد سوار تھے جن میں تین عملے کے ارکان اور پانچ مسافر شامل تھے۔

امریکی فیڈرل ایوی ایشن ایڈمنسٹریشن (FAA) کے مطابق زخمیوں کی نوعیت اور تعداد فوری طور پر واضح نہیں ہو سکی۔ بینگر انٹرنیشنل ایئرپورٹ کی انتظامیہ نے بتایا کہ شام تقریباً 7:45 بجے ایمرجنسی ٹیمیں جائے حادثہ پر پہنچیں اور امدادی کارروائیاں کئی گھنٹوں تک جاری رہیں۔

حادثے کے بعد ایئرپورٹ کو رات بھر بند کر دیا گیا اور ایک ایمرجنسی آپریشن سینٹر قائم کیا گیا۔ FAA نے کہا کہ حادثے کی تحقیقات نیشنل ٹرانسپورٹیشن سیفٹی بورڈ (NTSB) کے ساتھ مل کر کی جائیں گی۔

یہ حادثہ ایسے وقت پیش آیا جب شمال مشرقی امریکا میں شدید برفانی طوفان جاری تھا، اور مائن میں درجہ حرارت نقطہ انجماد سے نیچے تھا۔ مقامی ریڈیو آڈیو کے مطابق، حادثے سے کچھ دیر قبل ایئر ٹریفک کنٹرولرز اور پائلٹس کم حدِ نگاہ اور ڈی آئسنگ کے مسائل پر گفتگو کر رہے تھے۔ ٹیک آف کی اجازت ملنے کے تقریباً دو منٹ بعد کنٹرولر نے ایئر فیلڈ پر تمام پروازوں کو روکنے کا اعلان کیا۔