26 نومبر احتجاج کیس: علیمہ خان کے وارنٹ گرفتاری جاری، عدالت کا روزانہ سماعت کا حکم

راولپنڈی(جانوڈاٹ پی کے) انسداد دہشتگردی عدالت راولپنڈی نے 26 نومبر 2024 کے احتجاج کے حوالے سے درج مقدمے میں ملزمہ علیمہ خان کے وارنٹ گرفتاری جاری کر دیے۔ عدالت نے علیمہ خان کی ایک روزہ حاضری سے استثنیٰ کی درخواست مسترد کرتے ہوئے پراسیکیوشن کی استدعا پر مقدمے کی سماعت روزانہ کی بنیاد پر کرنے کا حکم بھی دے دیا۔

مقدمے کی سماعت اے ٹی سی کے جج امجد علی شاہ نے کی، جبکہ عدالت نے آئندہ سماعت کل جمعرات تک ملتوی کر دی۔ سماعت کے دوران علیمہ خان کی جانب سے وکیل فیصل ملک اور سرکار کی طرف سے پراسیکیوٹر ظہیر شاہ عدالت میں پیش ہوئے۔

دورانِ سماعت ملزمان کے وکلاء کی جانب سے 5 ملزمان کے خلاف 10 گواہوں پر جرح مکمل کر لی گئی، تاہم بعض گواہوں پر آج جرح نہ ہو سکی۔

پراسیکیوٹر ظہیر شاہ نے عدالت کو بتایا کہ مقدمے کی اب تک 28 سماعتیں ہو چکی ہیں اور علیمہ خان کے رویے کے باعث مقدمہ مسلسل تاخیر کا شکار ہے، لہٰذا روزانہ کی بنیاد پر سماعت ضروری ہے۔

علیمہ خان کی جانب سے دائر حاضری سے استثنیٰ کی درخواست پر بھی پراسیکیوشن نے اعتراض اٹھایا اور مؤقف اختیار کیا کہ درخواست کے ساتھ لاہور میں زیر سماعت مقدمات کی کاز لسٹ منسلک نہیں کی گئی۔ عدالت نے دلائل سے اتفاق کرتے ہوئے حاضری سے استثنیٰ کی درخواست مسترد کر دی اور علیمہ خان کے وارنٹ گرفتاری جاری کر دیے۔