الیکشن کمیشن ان ایکشن: 159 ارکانِ پارلیمنٹ و صوبائی اسمبلیوں کی رکنیت معطل

اسلام آباد (جانوڈاٹ پی کے) الیکشن کمیشن آف پاکستان نے مالی گوشوارے جمع نہ کرانے پر قومی اسمبلی، سینیٹ اور چاروں صوبائی اسمبلیوں کے مجموعی طور پر 159 ارکان کی رکنیت معطل کر دی ہے، جبکہ معطل اراکین کو پارلیمنٹ اور متعلقہ اسمبلیوں میں داخلے سے بھی روک دیا گیا ہے۔

الیکشن کمیشن کے مطابق معطل ہونے والوں میں قومی اسمبلی کے 32 ارکان شامل ہیں، جبکہ پنجاب اسمبلی کے 50، سندھ اسمبلی کے 33، خیبرپختونخوا اسمبلی کے 28، بلوچستان اسمبلی کے 7 اور سینیٹ کے 9 ارکان کی رکنیت معطل کی گئی ہے۔ پنجاب اسمبلی کے معطل ارکان میں وزیر تعلیم رانا سکندر حیات بھی شامل ہیں۔

رکنیت معطل ہونے والے نمایاں اراکین میں وفاقی وزیر مصدق ملک، خالد مقبول صدیقی، ارشد وہرا، سردار اختر مینگل، سید عبدالقادر گیلانی، علی موسیٰ گیلانی، سائرہ افضل تارڑ اور مہرین رزاق بھٹو شامل ہیں۔

سینیٹ سے فوزیہ ارشد، عابد شیر علی، مراد سعید اور نور الحق قادری کی رکنیت بھی معطل کر دی گئی ہے۔

الیکشن کمیشن کے مطابق معطل ارکان، رکنیت بحال ہونے تک پارلیمنٹ یا صوبائی اسمبلی کی کسی بھی کارروائی میں حصہ نہیں لے سکیں گے۔ الیکشن ایکٹ کے تحت تمام اراکینِ اسمبلی مالی گوشوارے 15 جنوری تک جمع کرانے کے پابند ہیں۔

دوسری جانب سپیکر قومی اسمبلی ایاز صادق نے بھی اثاثہ جات کی تفصیلات جمع نہ کرانے پر 32 ارکان کو ایوان میں داخلے سے روکنے کے احکامات جاری کر دیے۔ سپیکر نے واضح ہدایت دی کہ ایسے ارکان کی حاضری بھی نہ لگائی جائے، اور کہا کہ جس رکن کا نام فہرست میں شامل ہے وہ خود ایوان سے باہر چلا جائے، فہرست موجود ہے اور ارکان اپنے نام چیک کر لیں۔