چین میں بغیر انسان چلنے والی جدید ٹیکسٹائل فیکٹری قائم

بیجنگ(جانو ڈاٹ پی کے)چین میں ٹیکنالوجی کی ایک اور بڑی مثال سامنے آگئی، جہاں 5 ہزار لومز پر مشتمل ایک ایسی ٹیکسٹائل فیکٹری قائم کی گئی ہے جو بغیر کسی انسانی عملے کے کام کر رہی ہے۔ یہ فیکٹری مصنوعی ذہانت (AI) اور مکمل آٹومیشن سسٹم کے ذریعے چوبیس گھنٹے، ہفتے کے ساتوں دن بلا تعطل کام کرتی ہے۔

رپورٹس کے مطابق فیکٹری میں جدید سینسرز، خودکار کنٹرول سسٹمز اور اے آئی سافٹ ویئر استعمال کیا گیا ہے جو نہ صرف پیداوار کو منظم کرتا ہے بلکہ مشینوں کی نگرانی، خرابیوں کی نشاندہی اور مرمت کے عمل کو بھی خودکار انداز میں انجام دیتا ہے۔ اس نظام کی بدولت پیداوار میں نمایاں اضافہ اور اخراجات میں واضح کمی ممکن ہوئی ہے۔

ماہرین کا کہنا ہے کہ اس قسم کی اسمارٹ فیکٹریاں مستقبل کی صنعت کا رخ متعین کریں گی، جہاں رفتار، معیار اور توانائی کی بچت کو اولین ترجیح حاصل ہوگی۔ چین کی یہ پیش رفت عالمی سطح پر صنعتی آٹومیشن اور مصنوعی ذہانت کے بڑھتے ہوئے استعمال کی عکاسی کرتی ہے۔