کسان حکومت کی اولین ترجیح ہیں، وزیراعظم شہباز شریف
اسلام آباد(جانوڈاٹ پی کے) وزیراعظم شہباز شریف نے کسانوں کی خوشحالی کو حکومت کی اولین ترجیح قرار دیتے ہوئے زرعی برآمدات میں اضافے کے لیے جامع اور قابلِ عمل لائحہ عمل مرتب کرنے کی ہدایت جاری کی ہے۔
ملکی زرعی برآمدات میں اضافے اور زرعی شعبے کو بین الاقوامی تقاضوں سے ہم آہنگ کرنے کے لیے قائم نجی شعبے کے ماہرین پر مشتمل ورکنگ گروپ کے اجلاس کی صدارت کرتے ہوئے وزیراعظم نے کہا کہ زرعی شعبے کی اصلاحات اور کسانوں کو عالمی سطح پر رائج جدید زرعی طریقوں سے متعارف کروانا حکومت کی ترجیحات میں سرفہرست ہے۔
وزیراعظم نے کہا کہ وفاقی حکومت اپنے دائرہ اختیار میں زرعی اصلاحات کے ساتھ ساتھ صوبائی حکومتوں کے تعاون سے زراعت کی ترقی کے لیے مؤثر اقدامات کر رہی ہے۔ انہوں نے واضح کیا کہ فی ایکڑ پیداوار میں اضافے کے لیے معیاری بیج، بروقت اور مناسب قیمت پر کھاد، اور فصلوں کو بیماریوں سے محفوظ رکھنے کے لیے ادویات کی فراہمی کو یقینی بنایا جا رہا ہے۔
شہباز شریف نے کہا کہ زرعی اجناس کی پراسیسنگ کے ذریعے برآمدات کے قابل مصنوعات تیار کرنے کے لیے پالیسی سطح پر اقدامات کیے جا رہے ہیں، تاکہ کسانوں کی آمدن میں اضافہ ممکن بنایا جا سکے۔ انہوں نے بتایا کہ حال ہی میں ایک ہزار پاکستانی طلبہ کو سرکاری خرچ پر چین میں زراعت کی جدید ٹیکنالوجی کی تربیت کے لیے بھیجا گیا ہے۔
وزیراعظم نے ماہی گیری، پھلوں اور ان سے تیار کردہ مصنوعات کی برآمدات بڑھانے، ساحلی علاقوں میں پام آئل کی پیداوار کے لیے پالیسی اقدامات تشکیل دینے اور آئندہ پانچ برسوں میں زرعی برآمدات میں نمایاں اضافے کے لیے جامع روڈ میپ تیار کرنے کی بھی ہدایت کی۔
اجلاس میں چیئرمین ورکنگ گروپ رانا نسیم اور ان کی ٹیم نے ملکی زرعی شعبے پر جامع رپورٹ پیش کی، جس میں درپیش مسائل، قلیل اور طویل المدتی اصلاحات اور عالمی سطح پر تقابلی جائزہ شامل تھا۔
اجلاس میں وفاقی وزرا احسن اقبال، رانا تنویر حسین، ڈاکٹر مصدق ملک، محمد اورنگزیب، عطا اللہ تارڑ، وزیر مملکت بلال اظہر کیانی، معاون خصوصی ہارون اختر اور متعلقہ اعلیٰ حکام نے شرکت کی۔
وزیراعظم نے ورکنگ گروپ کی بریفنگ کو سراہتے ہوئے قابلِ عمل، مؤثر اور جامع سفارشات کو حکومتی اصلاحاتی ایجنڈے کا حصہ بنانے کی ہدایت کی۔
