افغان دہشت گرد امراللہ کے تہلکہ خیز انکشافات

راولپنڈی(jano.pk)افغان دہشت گرد امر اللہ کے سوشل میڈیا پر تہلکہ خیز انکشافات سامنے آگئے۔نجی ٹی وی کے مطابق ننگرہار کے رہنے والے دہشت گرد امر اللہ کا کہنا تھا کہ 2021 میں اسپین بولدک کے راستے پاکستان میں داخل ہوا، قابض طالبان کے اقتدار میں آنے کے بعد پاکستان میں فوج اور پولیس کی ٹارگٹ کلنگ کا حکم ملا۔

امراللہ نے اعتراف کیا کہ وہ پاکستان میں کچلاک، نوشہرہ اور پھر پشاور میں مقیم رہا اور ٹارگٹ منتخب کرنے کے دوران پکڑا گیا۔

دہشت گرد نے کہا کہ پچھلی افغان حکومت میں ٹارگٹ کلنگ میں ملوث رہا ہوں۔

افغان دہشت گرد نے کہا کہ 2016 سے داعش کے کاموں اور ٹارگٹ کلنگ میں شامل تھا، میری پہلی ٹارگٹ کلنگ خوگیانو میں اربکیان کے ایک کمیٹی رکن کی تھی، اس کے بعد 2021 میں افغان حکومت کے ایک مخبر کو ٹارگٹ کیا۔

امر اللہ کے مطابق اسی دوران میرے استادوں نے کہا کہ مجھے پاکستان جہاد کے لیے بھیجنا ہے، میں نے کہا کہ پاکستان میں بہت سختی ہے کام کرنا مشکل ہے، 2021 میں پاکستان آیا اور داعش کی قیادت کے ساتھ رابطہ رہا۔

دہشت گرد کا کہنا تھا کہ کچھ دن بعد محمد نبی کو پاکستانی فوج نے گرفتار کرلیا، مجھے ذمہ داری دی گئی کہ میں پولیس اور فوج کی نگرانی کروں اس لیے میں پشاور منتقل ہوگیا۔افغان دہشت گرد نے کہا کہ مگر میں پروگرام فائنل کرنے سے پہلے ہی پکڑا گیا۔