طالبان دور میں خواتین قیدیوں کی تعداد میں 435 فیصد اضافہ

کابل(جانوڈاٹ پی کے)افغانستان میں طالبان کے اقتدار میں آنے کے بعد خواتین قیدیوں کی تعداد میں 435 فیصد اضافہ ہوا ہے اور یہ تعداد بڑھ کر ایک ہزار 825 تک پہنچ گئی ہے۔

افغان میڈیا کا بتانا ہے کہ طالبان کی وزارت داخلہ کی جانب سے جاری کردہ اعداد و شمار کے مطابق اس وقت خواتین کو ملک کی 34 جیلوں میں رکھا گیا ہے۔

اعداد و شمار کے مطابق سب سے زیادہ 469 خواتین کابل میں قید ہیں جو کسی ایک مقام پر خواتین قیدیوں کی سب سے بڑی تعداد ہے۔  رپورٹ میں بتایا گیا ہے کہ زیر حراست خواتین کی تعداد گزشتہ سال کے مقابلے میں 18.7 فیصد بڑھی ہے۔

افغان میڈیا کا کہنا ہے کہ 2001 سے 2021 تک جمہوری دور کے دوران افغانستان میں خواتین قیدیوں کی تعداد کبھی بھی ایک ہزار سے زیادہ نہیں ہوئی۔

15 اگست 2021 کو طالبان کے اقتدار سنبھالنے کے  تقریباً چار سال بعد ملک میں قیدیوں کی مجموعی تعداد 24 ہزار 446  تک پہنچ گئی ہے جن میں ایک ہزار 825 خواتین ہیں۔