فرانس میں 20سالہ افغان داعش کا دہشت گرد گرفتار

پیرس(جانو ڈاٹ پی کے)فرانس کے سکیورٹی اداروں نے ایک بڑی کارروائی کے دوران 20 سالہ افغان شہری کو گرفتار کر لیا ہے جس پر داعش خراسان سے تعلق رکھنے اور دہشت گردی کی مالی معاونت کے الزامات عائد کیے گئے ہیں۔

فرانسیسی انسدادِ دہشت گردی پراسیکیوشن (PNAT) کے مطابق، ملزم کو گزشتہ ہفتے شہر لیون (Lyon) سے گرفتار کیا گیا، جس کے بعد عدالت نے اسے ریمانڈ پر جیل بھیج دیا۔ تحقیقات کے دوران انکشاف ہوا ہے کہ گرفتار شخص جہادی نظریات کا حامی ہے اور وہ داعش خراسان کے ساتھ رابطے میں تھا۔

فرانسیسی حکام کئی ہفتوں سے اس نوجوان کی سرگرمیوں کی نگرانی کر رہے تھے

فرانسیسی حکام کئی ہفتوں سے اس نوجوان کی سرگرمیوں کی نگرانی کر رہے تھے۔ ابتدائی شواہد سے ظاہر ہوتا ہے کہ وہ ممکنہ طور پر دہشت گرد نیٹ ورک کے لیے مالی وسائل اکٹھا کرنے یا آن لائن رابطوں کے ذریعے تنظیمی سرگرمیوں میں شامل تھا۔

فرانسیسی حکام کا کہنا ہے کہ انسدادِ دہشت گردی کے قانون کے تحت کیس کی مزید تحقیقات جاری ہیں، اور اس بات کا جائزہ لیا جا رہا ہے کہ آیا ملزم کے دیگر ساتھی یا رابطے بھی یورپ کے مختلف حصوں میں موجود ہیں۔

یہ گرفتاری یورپ میں بڑھتی ہوئی دہشت گردی کے خطرات کے تناظر میں اہم پیشرفت ہے۔ فرانسیسی ادارے اس معاملے کو انتہائی حساسیت کے ساتھ دیکھ رہے ہیں تاکہ داعش خراسان کے نیٹ ورک کو مکمل طور پر بے نقاب کیا جا سکے۔